ەلىمىزدە تاعى ءبىر مەرەكە كۇنى بەلگىلەنبەك

2144
Adyrna.kz Telegram

ەلىمىزدە "سپورت باپكەرى كۇنىن" رەسمي تۇردە ەنگىزۋدى ۇسىندى. بۇل تۋرالى "قازاقستان سپورتشىلار وداعى" قوعامدىق بىرلەستىگى حابارلادى.

"ەلىمىزدە كوپتەگەن كاسىبي مەرەكە اتاپ وتىلەدى. ولاردىڭ ىشىندە مۇعالىمدەر كۇنى، ەنەرگەتيكتەر كۇنى، قارجىگەرلەر كۇنى بار. بىراق، وكىنىشكە قاراي، كۇنتىزبەدە ءالى كۇنگە دەيىن سپورت باپكەرى كۇنى جوق. سپورت قوعامى اتىنان "سپورت باپكەرى كۇنىن" رەسمي تۇردە ەلىمىزدەگى كاسىبي مەرەكەلىك كۇنتىزبەگە ەنگىزۋدى ۇسىنامىز", - دەدى قوعامدىق بىرلەستىك توراعاسى ازامات قارلىعاشەۆ.

ۇيىمنىڭ ءباسپاسوز قىزمەتى قازىرگى ۋاقىتتا مەرەكە بەيرەسمي تۇردە 30 قازاندا اتاپ وتىلەتىنىن ايتتى. الايدا وداق 7 ءساۋىر - اتاقتى سپورتشى قاجىمۇقان مۇڭايتپاسوۆتىڭ تۋعان كۇنىندە سپورت باپكەرى كۇنىن اتاپ ءوتۋدى ۇسىنادى.

"2021 جىلدىڭ 7 ساۋىرىندە ەلىمىزدە ۇلى سپورتشى قاجىمۇقان مۇڭايتپاسوۆتىڭ 150 جىلدىعى اتاپ وتىلەدى. ءبىز مەرەكەنى ءدال وسى كۇنى اتاپ ءوتۋ دۇرىس دەپ ەسەپتەيمىز", - دەدى ازامات قارلىعاشەۆ.

بۇل باستامانى قازاقستاننىڭ سپورت ارداگەرلەرى قولدادى.

"بىزدە ەڭبەك سىڭىرگەن باپكەرلەر كوپ. ولاردىڭ ەڭبەگىن باعالاۋ قيىن. كوپشىلىگى ەلىمىزدىڭ اتىن بۇكىل الەمگە تانىتىپ، دارىپتەيتىن الەمدىك چەمپيونداردى تاربيەلەدى. بۇل رەتتە باپكەرلەردىڭ كاسىبي مەرەكەسى جوق ەكەنى وكىنىشتى", - دەدى بوكستان كسرو-نىڭ بەس دۇركىن چەمپيونى، قازاقستاندىق سپورتشىلار وداعىنىڭ قۇرمەتتى مۇشەسى بولات تەمىروۆ.

"قازاقستاندا باپكەرلەردە ەشقانداي باسىمدىق جوق. كوبىنەسە ولار جەڭىمپاز كولەڭكەسىندە قالىپ قويادى. سوندىقتان ولارعا مەملەكەتتىك دەڭگەيدە كوبىرەك كوڭىل ءبولۋ كەرەك", - دەدى سادىق مۇستافاەۆ.

قازىرگى ۋاقىتتا قازاقستان سپورتشىلار وداعى پرەزيدەنت اكىمشىلىگى مەن مادەنيەت جانە سپورت مينيسترلىگىنە ۇسىنىس حات جولدادى. وداق مۇشەلەرى ۆەدومستۆو بەرگەن رەسمي جاۋاپتى كەيىنىرەك حابارلاۋعا ۋادە بەردى.

پىكىرلەر