«كاسىپقوي بوكس الەمىندە ۇزدىك تانىلعان، ەلىمىزدى كۇللى الەمگە تانىتقان گەننادي گولوۆكينگە ەسكەرتكىش قويۋ كەرەك». الماتىدا ۇلىستىڭ ۇلى كۇنى قارساڭىندا وتەتىن كاسىپقوي بوكس كەشىنىڭ ءباسپاسوز جيىنىندا بەلگىلى باپكەر ساعاتبەك مۇساحانوۆ وسىلاي دەدى، دەپ حابارلايدى "ادىرنا" ۇلتتىق پورتالى Azattyq Ruhy-نا سىلتەمە جاساپ.
ساعاتبەك مۇساحانوۆ – جاڭقوش تۇراروۆتىڭ جەكە باپكەرى. الايدا باپكەر جاستارعا ۇلگى بولعان، ەل نامىسىن حالىقارالىق ارەنالاردا ۇزاق جىل قورعاپ كەلگەن گەننادي گولوۆكينگە ەڭسەلى ەسكەرتكىش تۇرعىزۋ كەرەك ەكەنىن ايتتى.
«جاڭقوشپەن ۇزاق جىل بىرگە كەلە جاتىرمىن. ارمانىم – ونى الەم چەمپيونى قىلۋ. ول ارمانىما ءبىر قادام جاقىنداعان سياقتىمىن. بىراق مەن وسى جيىندا باسقا ءبىر ۇسىنىستى ايتقىم كەلەدى. جۋىردا مەكسيكا ەلى ارداقتى ۇلى، كاسىپقوي بوكسشى ساۋل الۆارەسكە (57-2-2, 39 KO) ۇلكەن ەسكەرتكىش تۇرعىزدى. ول ەلىنىڭ اتىن شىعارۋعا ەڭبەك ءسىڭىردى. ول ءبىزدىڭ ماقتانىشىمىز گەنامەن دە شارشى الاڭعا شىققان. گەننادي گولوۆكين (42-1-1, 37 KO) قازاقستاننىڭ اتىن الەمگە پاش ەتتى. گولوۆكينگە ەسكەرتكىش قويۋ كەرەك دەپ سانايمىن. ونىڭ ەڭبەكقورلىعى – جاستارعا ۇلگى»، - دەدى باپكەر ساعاتبەك مۇساحانوۆ.
"ادىرنا" ۇلتتىق پورتالى
