2 ءساۋىر كۇنى الماتىدا جۇك كولىگى جاياۋ جۇرگىنشىلەر وتكەلىندە جەتى جاستاعى ايزەرەنى قاعىپ كەتىپ، بالا وقيعا ورنىندا كوز جۇمعان ەدى. بۇگىن مارقۇمدى اقتىق ساپارعا شىعارىپ سالۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
جاقىندارىنىڭ ايتۋىنشا، ايزەرە ءۇش اپتادان كەيىن 8 جاسقا تولاتىن ەدى جانە تۋعان كۇنىن اسىعا كۇتكەنگە ۇقسايدى.
جەلىدە جەرلەۋ ءراسىمىنىڭ ۆيدەوسى تارادى. قايتىس بولعان قىزدىڭ وتباسى بۇل قايعىلى وقيعاعا اۆتوبۋس جۇرگىزۋشىسىن كىنالاپ، ونى جاۋاپقا تارتۋدى تالاپ ەتۋدە.
"اۆتوبۋس جۇرگىزۋشىسىن جازالاۋعا قوعامنىڭ نازارىن اۋدارعىمىز كەلەدى. جول-كولىك وقيعاسىنا سول كىنالى", – دەدى مارقۇمنىڭ تۋىسى.
ايزەرەنى 2 ساۋىردە جاياۋلار وتەتىن تۇستان ءوتىپ بارا جاتقان كەزدە بەلارۋس ازاماتى جۇرگىزگەن اۋىر جۇك كولىگى باسىپ كەتكەن. ۆيدەوجازبادا بالانىڭ اناسى جول جيەگىندە كۇتىپ تۇرعانى، ال بالانىڭ جولدان وتپەك بولعانى كورىنەدى.
سول ساتتە جولاۋشىلار اۆتوبۋسى بالانىڭ الدىن كەسىپ وتكەن. ونى اينالىپ وتپەك بولعان بالا جۇك كولىگىنىڭ استىنا تۇسكەن. وقيعا اناسىنىڭ كوز الدىندا بولدى.
بۇل جاعداي قوعامدا ۇلكەن رەزونانس تۋدىرىپ، الەۋمەتتىك جەلى قولدانۋشىلارى ءتۇرلى پىكىر بىلدىرۋدە. ءبىرى قالا ىشىندە اۋىر جۇك كولىكتەرىنىڭ قوزعالىسىنا تىيىم سالۋدى تالاپ ەتسە، ەندى ءبىرى جول ەرەجەسىن ساقتاماعان اۆتوبۋستى كىنالاپ وتىر. سونىمەن قاتار، كەيبىرى انانىڭ بالانى ءوزى جەتەكتەپ وتپەگەنىنە وكىنەتىنىن ايتۋدا.
پوليتسيا دەپارتامەنتىنىڭ مالىمەتىنشە، جول-كولىك وقيعاسى الاتاۋ اۋدانى، بورالداي مەن ناۆوي كوشەلەرىنىڭ قيىلىسىندا ساعات 12:17-دە تىركەلگەن. مارقۇم بولعان بالا جاياۋ جۇرگىنشىلەر جولاعىمەن ءوتىپ بارا جاتقان، الايدا جۇك كولىگى ۋاقىتىندا توقتاي الماي، ونى قاعىپ كەتكەن.
