الماتىنىڭ تۇركسىب اۋدانىندا Toyota Land Cruiser Prado كولىگىنىڭ جۇرگىزۋشىسى كوشە گاز قۇبىرىنىڭ تىرەكتەرىن سوعىپ، سالدارىنان جۇزدەگەن ءۇي گازسىز قالدى، دەپ حابارلايدى "ادىرنا" ۇلتتىق پورتالى «QazaqGaz Aimaq» اق ءباسپاسوز قىزمەتىنە سىلتەپ.
وقيعا 6 قاراشا كۇنى بولعان.
كومپانيانىڭ مالىمەتىنشە، وقيعا سالدارىنان ورتا قىسىمدى گاز قۇبىرىنىڭ شامامەن 10 مەترى زاقىمدانعان جانە التى تىرەك مايىسىپ، گازدىڭ شىعۋى تىركەلگەن. قاۋىپسىزدىك ماقساتىندا اپاتتىق قىزمەت دەرەۋ 653 تۇتىنۋشىعا، ونىڭ ىشىندە 646 جەكە ۇيگە، ءۇش شاعىن بيزنەس نىسانى مەن ءتورت وندىرىستىك كاسىپورىنعا گاز بەرۋدى توقتاتتى.
گاز قىزمەتىنىڭ ماماندارى وقيعا ورنىنا جەدەل جەتىپ، زاقىمدالعان ۋچاسكەنى جاپتى جانە گازدىڭ شىعۋىن جويدى. قازىر قالپىنا كەلتىرۋ جۇمىستارى جۇرگىزىلۋدە. اپات ايماعى قورشالىپ، تاۋلىك بويى باقىلاۋعا الىنعان.
«تۇرعىنداردىڭ قاۋىپسىزدىگى مەن گازبەن ۇزدىكسىز قامتۋ – ءبىزدىڭ باستى باسىمدىعىمىز. بارلىق كۇش گاز بەرۋدى تەزىرەك قالپىنا كەلتىرۋگە جانە تۇتىنۋشىلارعا كەلتىرىلگەن قولايسىزدىقتى ازايتۋعا باعىتتالۋدا»، – دەلىنگەن كومپانيا حابارلاماسىندا.
وقيعا جونىندە جول پوليتسياسى دا حاباردار ەتىلدى. جۇرگىزۋشىگە قاتىستى اكىمشىلىك شارا قولدانۋ تۋرالى ءوتىنىش بەرىلگەن.
