2 sáýir kúni Almatyda júk kóligi jaıaý júrginshiler ótkelinde jeti jastaǵy Aızereni qaǵyp ketip, bala oqıǵa ornynda kóz jumǵan edi. Búgin marqumdy aqtyq saparǵa shyǵaryp salý rásimi ótti, dep habarlaıdy "Adyrna" ulttyq portaly.
Jaqyndarynyń aıtýynsha, Aızere úsh aptadan keıin 8 jasqa tolatyn edi jáne týǵan kúnin asyǵa kútkenge uqsaıdy.
Jelide jerleý rásiminiń vıdeosy tarady. Qaıtys bolǵan qyzdyń otbasy bul qaıǵyly oqıǵaǵa avtobýs júrgizýshisin kinálap, ony jaýapqa tartýdy talap etýde.
"Avtobýs júrgizýshisin jazalaýǵa qoǵamnyń nazaryn aýdarǵymyz keledi. Jol-kólik oqıǵasyna sol kináli", – dedi marqumnyń týysy.
Aızereni 2 sáýirde jaıaýlar ótetin tustan ótip bara jatqan kezde Belarýs azamaty júrgizgen aýyr júk kóligi basyp ketken. Vıdeojazbada balanyń anasy jol jıeginde kútip turǵany, al balanyń joldan ótpek bolǵany kórinedi.
Sol sátte jolaýshylar avtobýsy balanyń aldyn kesip ótken. Ony aınalyp ótpek bolǵan bala júk kóliginiń astyna túsken. Oqıǵa anasynyń kóz aldynda boldy.
Bul jaǵdaı qoǵamda úlken rezonans týdyryp, áleýmettik jeli qoldanýshylary túrli pikir bildirýde. Biri qala ishinde aýyr júk kólikteriniń qozǵalysyna tyıym salýdy talap etse, endi biri jol erejesin saqtamaǵan avtobýsty kinálap otyr. Sonymen qatar, keıbiri ananyń balany ózi jetektep ótpegenine ókinetinin aıtýda.
Polıııa departamentiniń málimetinshe, jol-kólik oqıǵasy Alataý aýdany, Boraldaı men Navoı kósheleriniń qıylysynda saǵat 12:17-de tirkelgen. Marqum bolǵan bala jaıaý júrginshiler jolaǵymen ótip bara jatqan, alaıda júk kóligi ýaqytynda toqtaı almaı, ony qaǵyp ketken.
