Алматы қаласының Боралдай көшесінде ауыр жүк көлігі 2017 жылы туған баланы қағып кетіп, оқиға орнында мерт болды, деп хабарлайды “Адырна” ұлттық порталы.
2 сәуірде болған қайғылы жағдай кезінде Беларусь азаматы жүк көлігінін басқарған. Видеожазбада баланың анасы жол жиегінде күтіп тұрғаны, ал баланың жолдан өтпек болғаны көрінеді.
Сол сәтте жолаушылар автобусы баланың алдын кесіп өткен. Оны айналып өтпек болған бала жүк көлігінің астына түскен. Оқиға анасының көз алдында болды.
Бұл жағдай қоғамда үлкен резонанс тудырып, әлеуметтік желі қолданушылары түрлі пікір білдіруде. Бірі қала ішінде ауыр жүк көліктерінің қозғалысына тыйым салуды талап етсе, енді бірі жол ережесін сақтамаған автобусты кінәлап отыр. Сонымен қатар, кейбірі ананың баланы өзі жетектеп өтпегеніне өкінетінін айтуда.
Полиция департаментінің мәліметінше, жол-көлік оқиғасы Алатау ауданы, Боралдай мен Навои көшелерінің қиылысында сағат 12:17-де тіркелген. Марқұм болған бала жаяу жүргіншілер жолағымен өтіп бара жатқан, алайда жүк көлігі уақытында тоқтай алмай, оны қағып кеткен.
Қазіргі таңда құқық қорғау органдары оқиғаның мән-жайын анықтауда.
