الماتى قالاسىندا ءبىرىنشى سىنىپقا قازىردىڭ وزىندە 27 مىڭعا جۋىق بالا قابىلداندى. ونىڭ ىشىندە 57 پايىزى مەملەكەتتىك تىلدە ءبىلىم الاتىن بولادى. بۇل تۋرالى قالالىق ءبىلىم باسقارماسىنىڭ باسشىسى سايران سايفەدەنوۆ وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا مالىمدەدى، دەپ حابارلايدى «ادىرنا» ءتىلشىسى.
ونىڭ سوزىنشە، جىل سايىن مەملەكەتتىك تىلدە وقۋعا دەگەن سۇرانىس ارتىپ كەلەدى. بۇگىندە مەگاپوليستەگى بارلىق وقۋشىلاردىڭ 51%-ى قازاق تىلىندە ءبىلىم الىپ جاتىر.
«مىسالى، 1990 جىلى مەملەكەتتىك تىلدە بار-جوعى 11 مىڭ عانا وقۋشى وقىعان بولسا، بيىل ولاردىڭ سانى 177 مىڭعا جاقىندادى. ياعني بۇل كورسەتكىش تابيعي تۇردە 16 ەسەگە ءوستى»، – دەدى سايفەدەنوۆ.
سپيكەردىڭ ايتۋىنشا، قازاقستان رەسپۋبليكاسىنىڭ ءاربىر ازاماتى بالاسىنىڭ وقۋ ءتىلىن ءوز قالاۋى بويىنشا تاڭداۋعا قۇقىلى. قولدانىستاعى نورماتيۆتىك ەرەجەلەرگە سايكەس، مەكتەپتەر قىزمەت كورسەتۋ ايماعىندا تۇراتىن بارلىق بالالاردى قابىلداۋعا مىندەتتى، ال جاڭا ءبىلىم بەرۋ مەكەمەلەرىن اشۋ بارىسىندا وقۋ ءتىلى قوعامدىق سۇرانىسقا قاراي انىقتالادى.
«سوڭعى 12 جىلدا الماتىدا 24 جاڭا مەكتەپ اشىلدى، سونىڭ 19-ى نەمەسە 80%-ى – مەملەكەتتىك تىلدە ءبىلىم بەرەدى. سونىمەن قاتار، «كەلەشەك مەكتەپتەرى» ۇلتتىق جوباسى اياسىندا اشىلۋى جوسپارلانعان 12 مەكتەپتىڭ 9-ى قازاق تىلىندە بولادى. مۇنىڭ ءبارى اتا-انالاردىڭ سۇرانىسىنا بايلانىستى»، – دەپ اتاپ ءوتتى ءبىلىم باسقارماسىنىڭ باسشىسى.
بريفينگ بارىسىندا ايتىلعانداي، باستى باسىمدىق – حالىقتىڭ قاجەتتىلىكتەرىن ەسكەرە وتىرىپ، قولايلى ءارى قولجەتىمدى ءبىلىم بەرۋ ورتاسىن قالىپتاستىرۋ.
ايتا كەتەيىك، 1-سىنىپقا قۇجات قابىلداۋ 31 تامىزعا دەيىن جالعاسادى.
