قازاقستانداعى تانىمال حابارلاندىرۋ سايتتارىنىڭ بىرىندە ەلدىڭ ەكس-پرەزيدەنتى نۇرسۇلتان نازارباەۆقا تيەسىلى دەلىنگەن، ساتىلۋعا ۇسىنىلعان 1993 جىلعى Mercedes 600 SEL (Sonderschutz) GUARD B7 اۆتوكولىگىنىڭ وتپەي كەلە جاتقانى تاعى دا قوعام نازارىن اۋداردى.
قازاقستاننىڭ ەكس-پرەزيدەنتى نۇرسۇلتان نازارباەۆقا تيەسىلى دەلىنگەن 1993 جىلعى ەكسكليۋزيۆتى Mercedes 600 SEL (Sonderschutz) GUARD B7 اۆتوكولىگى ساتىلىمعا شىققانى تۋرالى بىلتىر دا ايتىلعان بولاتىن. حابارلاندىرۋ بەرىلگەلى كولىكتىڭ باعاسى دا اسا كوپ وزگەرە قويعان جوق. تەك كەي كەزدە 20 ملن تەڭگەگە تومەندەپ، كەيىن قايتادان 222 ملن تەڭگەگە كوتەرىلگەن. كولىك ساتاتىن سايتتا بۇل باعانىڭ باسقا دا وسىعان ۇقساس كولىكتەردەن 218 723 016 تەڭگەگە (6674,5%) قىمبات ەكەنى دە كورسەتىلگەن.
“قر العاشقى پرەزيدەنتىنىڭ كولىگى” دەلىنگەن مەرسەدەستىڭ قۇنى سان قۇبىلعان. Kolesa.kz سايتىندا بىرنەشە جىل بويى ساتۋدا تۇرعان كولىكتىڭ باعاسى 222 ملن - 200 ملن اراسىندا.
2022 جىلى جاريالانعان حابارلاندىرۋدا:
“بروندالعان كولىكتىڭ باعاسى 25 ملن تەڭگە نەمەسە شامامەن 53 مىڭ دوللار بولسا، قازىر ونىڭ قۇنى 260 ملن تەڭگە دەپ كورسەتىلگەن”، - دەلىنگەن. ال كولىكتىڭ قازىرگى ساۋدالانىپ جاتقان باعاسى — 444 مىڭ دوللار نە 222 ميلليون تەڭگە.
اتى-ءجونىن اتاماۋدى وتىنگەن كولىك ەكسپەرتتەرىنىڭ ءبىرى ەكس-پرەزيدەنتتىڭ كولىگىنىڭ نەگە ءالى كۇنگە دەيىن ساتىلماي تۇرعانىن بىلاي تۇسىندىرەدى.
"كولىكتىڭ قۇراستىرىلعانىنا 30 جىلدان اسىپ كەتكەن. ونىڭ قۇرال-سايماندارىن تابۋ وتە قيىن. ول كولىكتىڭ قوزعالتقىشىنا قازىر ەشقانداي سايمان جوق. ءبىزدىڭ نارىقتا باعالانبايتىن كولىك. ونى تەك "پرەزيدەنت ءمىندى" دەپ قانا باعالاۋعا بولادى. ءدال وسى كولىكتىڭ 3 ساتىسى بار. العاشقى شىققانى وسى، ەكىنشىسى دە اسا باعالانبايدى. ءۇشىنشى شىققان ءتۇرى عانا جوعارى باعالانادى. بۇل كولىكتىڭ قازىرگى نارىقتاعى باعاسى ارى كەتسە 5 ميلليونعا ساتىلادى. ول 222 ميلليونعا تۇرمايدى. ونىڭ سالىعى بار. ەسكى كولىكتى الىپ، شامامەن 700 مىڭ تەڭگە ۇكىمەتكە كىم سالىق تولەگىسى كەلەدى؟" - دەيدى اۆتوەكسپەرت.
كولىكتىڭ ەرەكشەلىگى قانداي؟
ساتىلىمعا قويىلعان كولىك گەرمانيادا مەملەكەت باسشىلارى ءۇشىن ارنايى جاسالعان. بۇل تۋرالى Kolesa.kz سايتىندا جازىلعان.
ول B7 دەڭگەيىندەگى بروندى قورعانىس كاپسۋلاسىمەن جابدىقتالعان، ياعني كالاشنيكوۆ اۆتوماتىننان اتىلعان وقتارعا جانە 4 كگ تروتيلدىك جارىلىسقا توتەپ بەرە الادى.
كولىكتىڭ سايتتاعى سيپاتتامالارى رەتىندە زاۋىتتىق بروندى كاپسۋلا، B7 قورعانىس دەڭگەيى، ءورت ءسوندىرۋ جۇيەسى، وق وتپەيتىن وتىن باگى، Continental CTS 265-40 R500 ارنايى شينالارى، 6 ليترلىك V12 قوزعالتقىشى ەرەكشە اتالعان.
ساتۋشىنىڭ ايتۋىنشا، ءدال وسىنداي مودەل گرۋزيانىڭ ەكس-پرەزيدەنتى ەدۋارد شەۆاردنادزەنىڭ ءومىرىن ساقتاپ قالعان. ونىڭ كولىگىنە گراناتومەتتەن شابۋىل جاسالعانىمەن، پرەزيدەنت امان قالعان. ال رەسەي پرەزيدەنتى ۆلاديمير پۋتين پايدالانعان وسىنداي Mercedes S600 Guard كەيىننەن 1,3 ميلليون ەۋروعا ساتىلعان.
ەكس-پرەزيدەنتتىڭ كولىگى مە؟
Kolesa.kz-تەگى حابارلاندىرۋدا كولىك قازاقستاننىڭ تۇڭعىش پرەزيدەنتىنە تيەسىلى العاشقى كولىك دەپ كورسەتىلگەن. ءتىپتى ساتۋشى نازارباەۆتىڭ سۋرەتىن جۇكتەگەن. بىراق كولىك يەسى ءوزىن اسەت دەپ تانىستىرعان ازاماتپەن Orda.kz تىلشىلەرى بايلانىسقا شىققاندا، ول تەك «بارلىق قۇجاتتار بار» دەپ قىسقا قايىرعان.
بۇعان دەيىن ءدال وسىنداي Mercedes استاناداعى تۇڭعىش پرەزيدەنت مۋزەيىندە تۇرعانى تۋرالى اقپارات تاراعان. بىراق مۇراجاي قىزمەتكەرلەرى بۇل ماسەلە بويىنشا تۇسىنىكتەمە بەرگەن جوق.
ال تەمىرتاۋداعى تۇڭعىش پرەزيدەنتتىڭ تاريحي-مادەني ورتالىعىنا تاپسىرىلعان Mercedes-Benz 2005 جىلعى مودەل بولعان. ال وزگە ءبىر كولىگى قاسكەلەڭدەگى "اتامەكەن" مۋزەيىندە تۇر.
رەسمي اقپارات بار ما؟
نازارباەۆقا تيەسىلى بولۋى مۇمكىن كولىك تۋرالى رەسمي مالىمەتتەر جوق. ساتۋشىنىڭ سوزىنە سەنسەك، بۇل – «بۇكىل ەلدىڭ تاريحىن بەينەلەيتىن انتيكۆاريات». دەگەنمەن كولىكتىڭ زاڭدى يەسى كىم ەكەنى ءالى بەلگىسىز.
قازىر ەكسكليۋزيۆتى كولىك تاراز قالاسىندا، ساتىپ الۋشىلارعا كەلىپ، تەكسەرۋگە مۇمكىندىك بار ەكەنى ايتىلعان. ساتۋشى «ناعىز ساتىپ الۋشى بولسا، ساۋدالاسۋعا بولادى» دەپ مالىمدەگەن.
حابارلاندىرۋدا كورسەتىلگەن كولىكتىڭ قۇجاتىنان ونىڭ پرەزيدەنتتىڭ اۆتوپاركىنە تيەسىلى بولعانىن بايقاۋعا بولادى. ءبىر قىزىعى وسى قۇجاتتا "كولىكتىڭ قۋاتى" دەگەن تۇسقا ارقانداي ءبىر مالىمەت جازىلماعان. بۇل (تەحپاسپورت) كولىكتىڭ بۇرىنعى قۇجاتى بولۋى مۇمكىن.
وسىعان دەيىن الماتىدا وسىعان ۇقساس باسقا دا كولىكتەردىڭ ساتىلىمعا شىعارىلعانى ايتىلعان. بىراق حابارلاندىرۋ، قۇلاقتاندىرۋ سايتتارىنا بەرىلمەگەن. الماتىدا ساتىلادى دەگەن سونداي كولىكتەردىڭ ءبىرىن ەكس-پرەزيدەنت مىنگەندىگى ايتىلسا، تاعى دا ءبىرىنىڭ پرەمەر-مينيستر، الدە سىرتقى ىستەر ءمينيسترى كەزىندە قازىرگى ەل باسشىسىنىڭ قولدانىسىندا بولعانى تۋرالى ناقتىلانباعان مالىمەت تاراعان.
جەلىدەگى پىكىرلەر
جەلى جۇرتى كولىك ساتىلىمىنا قاتىستى ءتۇرلى پىكىر دە بىلدىرگەن. قايرات ەسىمدى جەلى قولدانۋشىسى "الماس ەدىم" دەپ پىكىر بىلدىرسە، mendesh4362 ەسىمدى وقىرمان "اقشاسى ءبىتىپ قالىپ پا، قاشقالى جاتىر ما ەكەن" دەپ سۇراق قويعان. Shamak.off ەسىمدى جەلى قولدانۋشىسى "بوياۋى وزىنىكى مە؟ ماي جەمەي مە ەكەن؟" دەپ ساۋال قويعان. nagyzkazakh006 ەسىمدى وقىرمان "بايعۇس نازارباەۆ، شاماسى ايەلدەرىنە اقشا جەتپەي، كولىگىن ساتىپ جاتقان بولار" دەگەن سىندى ءتۇرلى پىكىر قالدىرعان. ال nurakhmetmyrzakhmetovich ەسىمدى وقىرمان "اقشا كەرەك بولعان با، جەتپەي جاتىر ما ەكەن؟ حالىقتان سۇراسا جيناپ بەرەتىن شىعار..." دەپ جازدى.
