پرەمەر ءمينيستردىڭ ورىنباسارى تامارا دۇيسەنوۆا ەكس-پرەزيدەنت نۇرسۇلتان نازارباەۆتىڭ قانشا زەينەتاقى الاتىنا بايلانىستى سۇراققا جاۋاپ بەردى، دەپ حابارلايدى "ادىرنا" ۇلتتىق پورتالى.
ۇكىمەت وتىرىسىنان كەيىن جۋرناليستەر تامارا قاسىمقىزىنا «جاڭا جىلدان باستاپ زەينەتكەرلەردىڭ زەينەتاقىسى 8,5 پايىزعا ءوستى. جالپى وسى زەينەتاقى مولشەرى جەتكىلىكتى دەپ سانايسىز با؟ سىزدەردىڭ قوسقان تيىندارىڭىزدى ينفلياتسيا جەپ جاتىر» دەگەن سۇراق قويىلدى.
تامارا قاسىمقىزىنىڭ ايتۋىنشا، قازىر ەلىمىزدە 2,5 ميلليون زەينەتكەر بار.
«ەگەر دە 6,1 تريلليون تۋرالى ايتاتىن بولساق، ونىڭ 4 تريلليونى ىنتىماقتاستىرىلعان جانە بازالىق زەينەتاقىمەن تولەنەدى. سىزدەر ايتىپ جاتقان از، كوپ دەگەن دۇنيەنى ءبىز زاڭعا سايكەس، ينفلياتسياعا بايلانىستى كوتەرىپ جاتىرمىز. ەگەر دە ينفلياتسيانىڭ كولەمى ءوسىپ كەتىپ جاتسا، رەسپۋبليكالىق بيۋدجەتتە ونى قاراۋعا مۇمكىندىك بار. مىسالى وتكەن جىلى 5,4 ميلليارد تەڭگە زەينەتاقىعا بولسەك، بيىل 700 ميللياردقا كوپ بەرىپ جاتىرمىز.
سونداي-اق جۋرناليست ۆيتسە-پرەمەرگە «بارلىق زەينەتكەردىڭ زەينەتاقاسى ءوسىپ جاتقان كەزدە ەكس-پرەزيدەنت، باس زەينەتكەردىڭ زەينەتاقىسى ءوستى مە؟ ول كىسى قانشا زەينەتاقى الادى؟» دەپ سۇراق قويادى.
تامارا قاسىمقىزى ەكس-پرەزيدەنتتىڭ ناقتى قانشا زەينەتاقى الاتىنىن اشىپ ايتپادى. ايتسە دە ول نۇرسۇلتان نازارباەۆتىڭ زەينەتاقىسى 8,5 پايىزعا ءوسۋى مۇمكىن ەكەنىن ەسكەرتتى.
«ءبىزدىڭ ەكس-پرەزيدەنتىمىز نۇرسۇلتان ءابىشۇلى نازارباەۆتىڭ پەنسياسىن پرەزيدەنت اكىمشىلىگى تاعايىندايدى. سوندىقتان دا مەن قازىر ول كىسىنىڭ قانشا زەينەتاقى الاتىنىن ايتا المايمىن. ءار ءبىر ورگان زەينەتاقىنى جەكە ءوزى تاعايىندايدى. ەڭبەك مينيسترلىگى ءار ورگانعا سۇراعان مولشەر بويىنشا قارجى بەرىپ وتىرادى. مىسالى قورعانىس مينيسترلىگى «بىزگە مىنانشا كولەمدە قارجى كەرەك» دەپ ۇسىنىس بەرەدى. قازىر 181 مىڭ كۇش قۇرىلىمعا ءتيىستى مەكەمەنىڭ سۇرانىسى بويىنشا ەڭبەك مينيسترلىگى قارجى اۋدارىپ وتىر. ال ولاردىڭ ىشىندە كىم قانشا زەينەتاقى الاتىنىن مەملەكەتتىك مەكەمەنىڭ ءوزى انىقتايدى»، – دەدى ول.
