ارمەنيانىڭ بۇرىنعى پرەزيدەنتى جانە «ارمەنيا» وپپوزيتسيالىق بلوگىنىڭ جەتەكشىسى روبەرت كوچاريانعا ەل اۋماعىنان شىعۋعا ۋاقىتشا تىيىم سالىندى. بۇل تۋرالى ونىڭ كەڭسەسى مالىمدەدى، دەپ حابارلايدى “ادىرنا”.
اقپاراتقا سايكەس، كوچاريان 14 ماۋسىم كۇنى ەرەۆانداعى زۆارتنوتس حالىقارالىق اۋەجايىنان شەتەلگە ۇشۋدى جوسپارلاعان. الايدا شەكارا قىزمەتىنىڭ وكىلدەرى وعان ارمەنيادان شىعۋىنا شەكتەۋ قويىلعانىن حابارلاعان.
ەكس-پرەزيدەنت كەڭسەسىنىڭ جەتەكشىسى باگرات ميكوياننىڭ ايتۋىنشا، بۇل شەشىمنىڭ ناقتى سەبەبى تۇسىندىرىلمەگەن. كوچارياننىڭ جەكە ماقساتتاعى قىسقا ساپارعا شىقپاق بولعانى بەلگىلى، بىراق باراتىن ەلى جاريالانعان جوق.
بۇل وقيعا ارمەنيا بيلىگىنىڭ سايلاۋ كەزىندەگى زاڭ بۇزۋشىلىقتار مەن جەمقورلىققا قارسى مالىمدەمەلەرى اياسىندا ورىن الىپ وتىر. پرەمەر-مينيستر نيكول پاشينيان بۇعان دەيىن پارلامەنت سايلاۋىندا داۋىس ساتىپ الۋ دەرەكتەرى تىركەلگەنىن ايتىپ، زاڭ بۇزعاندارعا قاتىستى قاتاڭ شارالار قابىلداناتىنىن مالىمدەگەن بولاتىن.
سونىمەن قاتار ەلدەگى بەلگىلى كاسىپكەر ءارى «گۇلدەنگەن ارمەنيا» پارتياسىنىڭ جەتەكشىسى گاگيك تسارۋكيانعا قاتىستى دا قىلمىستىق ءىس قوزعالعان. باس پروكۋراتۋرا ونى اسا ءىرى كولەمدە سالىق تولەۋدەن جالتاردى دەپ ايىپتاپ وتىر.
روبەرت كوچاريان 1998–2008 جىلدارى ارمەنيا پرەزيدەنتى قىزمەتىن اتقارعان. كەيىن ول رەسەيدىڭ ءىرى ينۆەستيتسيالىق قۇرىلىمدارىنىڭ بىرىندە باسشىلىق قىزمەتتە جۇمىس ىستەدى. 2021 جىلى بىرنەشە ساياسي كۇشتىڭ بىرىگۋىمەن قۇرىلعان «ارمەنيا» بلوگىنا جەتەكشىلىك ەتىپ، ەلدىڭ وپپوزيتسيالىق ساياسي ساحناسىنداعى نەگىزگى تۇلعالاردىڭ بىرىنە اينالعان.
ەسكە سالساق، 14 ماۋسىمدا ارمەنيانىڭ ورتالىق سايلاۋ كوميسسياسى پارلامەنت سايلاۋىنىڭ قورىتىندىسىن جاريالادى. ناتيجەسىندە پرەمەر-مينيستر نيكول پاشينيان باسقاراتىن ازاماتتىق كەلىسىم پارتياسى پارلامەنتتەگى باسىم كوپشىلىك مانداتقا يە بولدى.
