ميانماداعى ءزىلزالادان قازا تاپقاندار سانى 2886-عا جەتتى، دەپ حابارلايدى "ادىرنا" ۇلتتىق پورتالى.
سونىممەن قاتار، 4,5 مىڭ ادام جاراقات الىپ، 370 ادام حابار-وشارسىز كەتكەن.
زارداپ شەككەن ايماقتاردا رەسەي، قىتاي، ءۇندىستان جانە سينگاپۋردان كەلگەن جەدەل قۇتقارۋ توپتارىنىڭ قاتىسۋىمەن ىزدەستىرۋ-قۇتقارۋ جۇمىستارى جالعاسۋدا. قۇتقارۋشىلار 100 ساعاتتان استام ۋاقىت ءۇيىندى استىندا قالعان ادامداردى شىعارىپ جاتىر.
ميانمانىڭ استاناسى نەيپيدوداعى قوناقۇي ۇيىندىلەرىنىڭ استىنان قۇتقارۋشىلار ءبىر ادامدى بەس كۇننەن كەيىن ءتىرى الىپ شىقتى. بۇل تۋرالى ەلدىڭ ءورت ءسوندىرۋ باسقارماسى حابارلادى.
قۇتقارۋشىلار ونىڭ ناقتى دەنساۋلىق جاعدايى تۋرالى اقپارات بەرگەن جوق. الايدا تارالعان ۆيدەودان جاس جىگىتتىڭ ايتارلىقتاي جاراقات الماعانىن بايقاۋعا بولادى. قۇتقارۋ جۇمىستارى جالعاسىپ جاتىر، بىراق امان قالعانداردى تابۋعا ءۇمىت ازايىپ بارادى.
ەسكە سالا كەتسەك، 28 ناۋرىزدا ميانما اۋماعىندا 7,7 ماگنيتۋدالى جەر سىلكىنىسى بولدى. سوعان بايلانىستى ەلدە ءبىر اپتالىق ۇلتتىق ازا تۇتۋ جاريالاندى. جەراستى دۇمپۋلەرى ءۇندىستان، تايلاند، لاوس جانە قىتايدا دا سەزىلگەن.
