اقش-تىڭ دەموكرات سەناتورى كوري بۋكەر پرەزيدەنت دونالد ترامپتىڭ «كونستيتۋتسياعا قايشى» ارەكەتتەرىنە قارسى 25 ساعاتتان استام ۋاقىت بويى ۇزدىكسىز ءسوز سويلەپ، سەنات تاريحىنداعى ەڭ ۇزاق سويلەۋ رەكوردىن جاڭارتتى، دەپ حابارلايدى "ادىرنا" ۇلتتىق پورتالى France 24-كە سىلتەپ.
بۋكەردىڭ مارافوندىق ءسوزى دۇيسەنبى كەشىندە باستالىپ، كەلەسى كۇنگە دەيىن جالعاسقان. ول سويلەپ تۇرعان كەزدە بىردە-ءبىر رەت وتىرماعان جانە ءۇزىلىس الماعان. ونىڭ بۇل ارەكەتى 1939 جىلعى «ميستەر سميت ۆاشينگتونعا بارادى» فيلمىندەگى اتىشۋلى ساحنانى ەسكە ءتۇسىردى.
بۇعان دەيىنگى رەكورد 1957 جىلى سەناتور ستروم تەرموندقا تيەسىلى بولعان. ول ازاماتتىق قۇقىقتار تۋرالى زاڭ جوباسىنا قارسىلىق رەتىندە 24 ساعات 18 مينۋت بويى ءسوز سويلەگەن ەدى. الايدا، بۋكەر بۇل كورسەتكىشتى باسىپ وزىپ، اقش سەناتىنداعى ەڭ ۇزاق ءسوز سويلەگەن ساياساتكەر اتاندى.
ءوز سوزىندە سەناتور بۋكەر:
«بۇل وڭشىلدار مەن سولشىلداردىڭ ايقاسى ەمەس. بۇل دۇرىس پەن بۇرىستىڭ ايىرماشىلىعى. امەريكا، سەنىڭ جۇرەگىڭدە كونستيتۋتسيا ءومىر سۇرە مە؟» – دەپ مالىمدەدى.
55 جاستاعى سەناتور رەكورد ورناتقاننان كەيىن ازىلدەدى.
«مەن ءبىراز ۋاقىت بۇل تۋرالى ۇمىتىپ، بيولوگيالىق قاجەتتىلىكتەرىمدى وتەۋىم كەرەك»، – دەپ مالىمدەدى.
بۋكەردىڭ تاريحي ءسوزى رەسپۋبليكالىق پارتيانىڭ سەناتتاعى داۋىس بەرۋ ناتيجەسىنە اسەر ەتپەگەنىمەن، ونىڭ ارەكەتى اقش تاريحىندا ەستە قالارلىق ساتتەردىڭ ءبىرى بولدى.
