2 ساۋىردە چەحيانىڭ سىرتقى ىستەر ءمينيسترى يان ليپاۆسكي رەسەيدىڭ چەحيادا جالعا الىپ وتىرعان جىلجىمايتىن مۇلىكتەرى ءۇشىن شامامەن 4 ميلليون ەۋرو قارىزى بار ەكەنىن مالىمدەدى، دەپ حابارلايدى “ادىرنا” ۇلتتىق پورتالى eadaily.com-عا سىلتەپ.
ونىڭ ايتۋىنشا، رەسەي چەحيادا 80-نەن استام نىساندى جالعا الادى، بىراق ءتيىستى تولەمدەردى جاساماعان.
چەحيا ءسىم-نە قاراستى ديپلوماتيالىق قىزمەت 2023 جىلدىڭ شىلدە ايىندا پراگا قالالىق سوتىنا رەسەيگە قارسى زاڭسىز بايۋ فاكتىسى بويىنشا شاعىم تۇسىرگەن. چەح تاراپى 2,1 ميلليون ەۋرودان استام قاراجاتتىڭ سوڭعى ءۇش جىلدا تولەنبەگەنىن العا تارتىپ وتىر.
«ولار سوتسياليزم كەزىندە باۋىرلاستىق قارىم-قاتىناستىڭ بەلگىسى رەتىندە جالداۋ اقىسىن تولەمەگەنىن تۇسىنەمىن. بىراق رەۆوليۋتسيادان كەيىنگى 30 جىل ىشىندە دە تولەم جاسالماۋى – تۇسىنىكسىز جاعداي»، – دەدى ليپاۆسكي.
2023 جىلدىڭ مامىرىندا چەحيا ۇكىمەتى 1970-80 جىلدارى كەڭەس وداعىنا ديپلوماتيالىق ماقساتتا تەگىن پايدالانۋعا بەرىلگەن جەر تەلىمدەرىنە قاتىستى توعىز قاۋلىنىڭ كۇشىن جويدى. كەيىن چەحيا ءسىم تەكسەرىس جۇرگىزىپ، رەسەيدىڭ 42 عيماراتقا يەلىك ەتەتىنىن، بىراق ولاردىڭ كوپشىلىگى ديپلوماتيالىق ماقساتتا قولدانىلمايتىنىن انىقتاعان.
2023 جىلدىڭ قاراشاسىندا چەحيا ۇكىمەتى رەسەيلىك مەملەكەتتىك مۇلىكتى باسقارۋمەن اينالىساتىن كاسىپورىندى سانكتسيالىق تىزىمگە قوستى. بۇل شەشىم رەسەيدىڭ چەحياداعى مەملەكەتتىك اكتيۆتەرىن ءىس جۇزىندە بۇعاتتاۋدى بىلدىرەدى، الايدا ول ەلشىلىك عيماراتتارىنا قولدانىلمايدى.
