قازاقستاندا اتوم سالاسى ءۇشىن بىلىكتى كادرلار دايارلاۋ بەلسەندى تۇردە جۇزەگە اسىرىلۋدا. ەنەرگەتيكا مينيسترلىگىنىڭ مالىمەتىنشە، ەلىمىزدە فيزيكا، ەنەرگەتيكا، ەلەكتروتەحنيكا جانە تاۋ-كەن ينجينيرينگى سەكىلدى سالالارعا بايلانىستى 18 ءبىلىم بەرۋ باعدارلاماسى بويىنشا ماماندار دايارلانادى، دەپ حابارلايدى "ادىرنا" ۇلتتىق پورتالى.
2024-2025 وقۋ جىلىنا وسى باعىتتار ءۇشىن 5 246 ءبىلىم بەرۋ گرانتى بولىنگەن، ونىڭ ىشىندە باكالاۆريات ءۇشىن 4 530 گرانت، ماگيستراتۋرا ءۇشىن 590 گرانت، دوكتورانتۋرا ءۇشىن 126 گرانت قاراستىرىلعان.
مامانداردى دايارلاۋ قازاقستاننىڭ جوعارى وقۋ ورىندارىندا، سونداي-اق يادرولىق تەحنولوگيالارعا ماماندانعان جەتەكشى شەتەلدىك جوعارى وقۋ ورىندارىمەن ىنتىماقتاستىق اياسىندا جۇزەگە اسىرىلۋدا.
«بولاشاق» مەملەكەتتىك باعدارلاماسى اياسىندا «اتوم جانە يادرولىق ونەركاسىپ» ماماندىعى باسىم باعىتتار قاتارىنا كىرەدى. 2024 جىلدان باستاپ اقش، ۇلىبريتانيا جانە فرانتسيادا وسى ماماندىق بويىنشا ءبىلىم الاتىن ءتورت ماگيسترانت دايىندالۋدا، ال رەسەي مەن ماجارستان دا وسى ەلدەر قاتارىنا قوسىلماق.
اتوم سالاسى بويىنشا كادرلاردى دايارلاۋ ءۇشىن قازاقستاندىق جوعارى وقۋ ورىندارىندا 5 ءبىلىم بەرۋ جانە ەكى ديپلومدىق باعدارلامالار بار. بۇل باعدارلامالار يادرولىق فيزيكا، يادرولىق ينجەنەريا، اتوم ەنەرگەتيكاسى جانە تەوريالىق يادرولىق فيزيكا سالالارىندا ءبىلىم الۋدى قامتيدى. سونىمەن قاتار، قازاقستان شەتەلدىك ارىپتەستەرىمەن عىلىمي جانە ءبىلىم بەرۋ بازاسىن دامىتۋ بويىنشا جۇمىس جۇرگىزۋدە. فرانتسيا، رەسەي جانە ۆەنگريامەن بىرقاتار قۇجاتتارعا قول قويىلعان.
قازاقستاننىڭ وتىن-ەنەرگەتيكالىق كەشەنىن دامىتۋدىڭ 2023-2029 جىلدارعا ارنالعان تۇجىرىمداماسىنا سايكەس، اتوم سالاسى بويىنشا جوعارى بىلىكتى كادرلار دايارلاۋ ءۇشىن شەتەلدىك باعدارلامالار ارقىلى وقۋعا گرانتتار بولىنەدى. سونىمەن قاتار، جۇمىس ىستەپ تۇرعان اتوم ەلەكتر ستانتسيالارىندا پراكتيكالار مەن تاعىلىمدامالار ۇيىمداستىرىلادى.
