مەملەكەتتىك رامىزدەر – ءاربىر ەلدىڭ ەگەمەندىگى مەن تاۋەلسىزدىگىنىڭ باستى نىشاندارى. قازاقستان رەسپۋبليكاسىنىڭ تۋى، ەلتاڭباسى جانە ءانۇرانى – حالقىمىزدىڭ بىرلىگى مەن مەملەكەتتىلىگىن ايقىندايتىن قاستەرلى بەلگىلەر. ولاردى قۇرمەتتەۋ – ەلگە، ونىڭ تاريحىنا جانە بولاشاعىنا دەگەن ادالدىقتىڭ كورىنىسى. ال مەملەكەتتىك رامىزدەرگە ۇقىپتى قاراۋ – ءاربىر ازاماتتىڭ پاتريوتتىق پارىزى.
قازاقستان رەسپۋبليكاسىنىڭ رامىزدەرى 1992 جىلى 4 ماۋسىمدا رەسمي تۇردە بەكىتىلدى. بۇل كۇن ەلىمىزدىڭ تاريحىنداعى ماڭىزدى داتا.
رامىزدەر حالقىمىزدىڭ ۇلتتىق بولمىسىن، رۋحىن، مادەنيەتىن ايقىن كورسەتەدى. مەملەكەتتىك تۋ – تاۋەلسىزدىكتىڭ سيمۆولى بولسا، ەلتاڭبا – حالقىمىزدىڭ تاريحى مەن مادەني مۇراسىن بەينەلەيدى. ال ءانۇران – ەلدىڭ رۋحىن كوتەرەتىن اسقاق تۋىندى.
مەملەكەتتىك رامىزدەر ەلىمىزدىڭ ماڭىزدى شارالارىندا، رەسمي كەزدەسۋلەردە، سپورتتىق جارىستاردا مىندەتتى تۇردە كورىنىس تابادى. اسىرەسە، حالىقارالىق ارەنالاردا قازاقستاننىڭ تۋى كوتەرىلىپ، ءانۇرانى ورىندالعاندا، ءاربىر قازاقستاندىقتىڭ جۇرەگىندە ماقتانىش سەزىمى پايدا بولادى.
ال 2022 جىلدىڭ 4 شىلدەسىنەن باستاپ، قازاقستاندا ازاماتتارعا مەملەكەتتىك تۋدى جەكە ۇيلەرىنە، بالكوندارىنا ىلۋگە رۇقسات بەرىلدى. بۇل ءوزگەرىس قازاقستان رەسپۋبليكاسىنىڭ «مەملەكەتتىك رامىزدەر تۋرالى» زاڭىنا ەنگىزىلگەن تۇزەتۋلەردەن كەيىن قابىلداندى.
مەملەكەتتىك رامىزدەرگە قۇرمەت تەك رەسمي ءىس-شارالاردا عانا ەمەس، كۇندەلىكتى ومىردە دە كورىنۋى ءتيىس. مەملەكەتتىك مەكەمەلەردە، وقۋ ورىندارىندا، قوعامدىق ورىنداردا رامىزدەردى دۇرىس ورنالاستىرۋ، ولاردىڭ تازالىعىن ساقتاۋ – ءاربىر ازاماتتىڭ جاۋاپكەرشىلىگى.
ال ولاردى قورلاۋ – زاڭعا قايشى ارەكەت. قازاقستان رەسپۋبليكاسىنىڭ زاڭناماسىنا سايكەس، رامىزدەرگە نەمقۇرايلى قاراۋ نەمەسە ولاردى قورلاۋ اكىمشىلىك جانە قىلمىستىق جاۋاپكەرشىلىككە اكەلەدى.
ماسەلەن، اكىمشىلىك قۇقىق بۇزۋشىلىق تۋرالى كودەكستىڭ 458-بابىنا ءسايكەس، رامىزدەردى قورلاعاندارعا 200 اەك (ايلىق ەسەپتىك كورسەتكىش) كولەمىندە ايىپپۇل سالىنادى نەمەسە 15 تاۋلىككە دەيىن اكىمشىلىك قاماۋعا الىنادى.
ەگەر رامىزدەردى قورلاۋ اۋىر قۇقىقبۇزۋشىلىق رەتىندە تانىلسا، قىلمىستىق كودەكستىڭ 372-بابىنا سايكەس، كىنالى تۇلعاعا ءىرى كولەمدە ايىپپۇل سالىنىپ، 2 جىلعا دەيىن باس بوستاندىعىنان ايىرۋ جازاسى قولدانىلۋى مۇمكىن.
ەسكە سالساق، كۇنى كەشە عانا اتىراۋدا بەت-ءجۇزىن تۇمشالاپ، قارا قيىنگەن قىزدار قازاقستاننىڭ ستاندارتقا ساي ەمەس تۋىن ۇستاپ، فوتوعا تۇسكەن بولاتىن. قىزداردىڭ بۇل ارەكەتى الەۋمەتتىك جەلىدە تاراپ، قوعامنىڭ قىزۋ تالقىسىنا ءتۇستى. اتىراۋ وبلىستىق پوليتسيا دەپارتامەنتىنىڭ مالىمەتىنشە، سۋرەتكە ءتۇسكەن ءتورت كۇدىكتى انىقتالىپ، ولار پوليتسيا بولىمشەسىنە جەتكىزىلگەن. ارتىنشا-اق مونيتورينگ ناتيجەسىندە 2 زاڭبۇزۋشىلىق انىقتالعان.
مادەنيەت جانە اقپارات مينيسترلىگى پىكىر ءبىلدىرىپ، تۋدى ساتقان ەكى ينتەرنەت-رەسۋرستى انىقتادى. بۇگىندە اتالعان ءماسەلە بويىنشا «مەملەكەتتىك ءرامىزدەردى قورلاۋ» بابىمەن قىلمىستىق ءىس تىركەلىپ، سوتقا دەيىنگى تەرگەۋ امالدارى جۇرگىزىلىپ جاتىر.
سوندىقتان جاستاردىڭ بويىندا پاتريوتتىق سەزىمدى قالىپتاستىرۋ ءۇشىن مەملەكەتتىك رامىزدەردىڭ ءمانىن ءتۇسىندىرۋ وتە ماڭىزدى. الەۋمەتتىك جەلىلەردە، مادەني شارالاردا، ءبىلىم بەرۋ ورىندارىندا رامىزدەر تۋرالى اقپارات تاراتىپ، جاستاردى ۇلتتىق قۇندىلىقتارعا جاقىنداتۋ قاجەت.
قازاقستان پرەزيدەنتى قاسىم-جومارت توقاەۆ 2022 جىلى مەملەكەتتىك رامىزدەردىڭ 30 جىلدىعىنا ارنالعان مەملەكەتتىك تۋ كوتەرۋ سالتاناتتى راسىمىندە رامىزدەردىڭ ءاربىرىمىزدىڭ جۇرەگىمىزگە ماقتانىش ۇيالاتاتىنىن ايتقان بولاتىن.
“قاسيەتتى نىشاندارىمىزدا قازاقتىڭ مىڭ جىلدىق ارمان-تىلەگى، ماقسات-مۇراتى تۇگەل توعىسقان. تۋ حالقىمىز ءۇشىن قاشاندا ەرلىك پەن ەلدىكتىڭ سيمۆولى سانالعان. كوك تۇرىكتەر زامانىندا بابالارىمىز ءبورىلى بايراقتىڭ توڭىرەگىنە توپتاستى. قازاق حاندىعىنىڭ تۋى بۇكىل ۇلتتى ۇيىستىردى، ەل بىرلىگىن بەكەمدەدى. ال، وتكەن عاسىردا ارىستارىمىز «الاش تۋى استىندا، كۇن سونگەنشە سونبەيمىز!» دەپ حالىققا جىگەر بەردى. كونە داۋىردەن ميراس بولعان وسى ءداستۇر ۇرپاقتان ۇرپاققا جالعاسىپ، بۇگىنگى كۇنگە جەتتى. قازاق ەلىنىڭ كوگىندە ۇلى دالانىڭ ايبىنىن اسىرعان تاۋەلسىزدىك تۋى جەلبىرەدى. كوك بايراعىمىز – مىزعىماس مەملەكەتتىلىكتىڭ بەلگىسى. ەلتاڭبامىز – ازاتتىقتىڭ ايشىقتى كورىنىسى. ال، ءانۇرانىمىز – ەركىندىك پەن ەلدىكتىڭ ءۇنى. تاۋەلسىزدىكتىڭ وسى ءۇش سيمۆولى حالقىمىزعا ەرەكشە رۋح بەرەدى. ارقايسىمىزدىڭ كەۋدەمىزگە ماقتانىش ۇيالاتادى. ويتكەنى، بۇل – بابالارىمىزدىڭ ورىندالعان ارمانى”، – دەدى قاسىم-جومارت توقاەۆ.
