Rämızderge qūrmet - eldıktıŋ belgısı

Memlekettık rämızder – ärbır eldıŋ egemendıgı men täuelsızdıgınıŋ basty nyşandary. Qazaqstan Respublikasynyŋ Tuy, Eltaŋbasy jäne Änūrany – halqymyzdyŋ bırlıgı men memlekettılıgın aiqyndaityn qasterlı belgıler. Olardy qūrmetteu – elge, onyŋ tarihyna jäne bolaşaǧyna degen adaldyqtyŋ körınısı. Al memlekettık rämızderge ūqypty qarau – ärbır azamattyŋ patriottyq paryzy.  

Qazaqstan Respublikasynyŋ rämızderı 1992 jyly 4 mausymda resmi türde bekıtıldı. Būl kün elımızdıŋ tarihyndaǧy maŋyzdy data.  

Rämızder halqymyzdyŋ ūlttyq bolmysyn, ruhyn, mädenietın aiqyn körsetedı.  Memlekettık Tu – täuelsızdıktıŋ simvoly bolsa, Eltaŋba – halqymyzdyŋ tarihy men mädeni mūrasyn beineleidı. Al Änūran  – eldıŋ ruhyn köteretın asqaq tuyndy. 

 Memlekettık rämızder elımızdıŋ maŋyzdy şaralarynda, resmi kezdesulerde, sporttyq jarystarda mındettı türde körınıs tabady. Äsırese, halyqaralyq arenalarda Qazaqstannyŋ tuy köterılıp, Änūrany oryndalǧanda, ärbır qazaqstandyqtyŋ jüregınde maqtanyş sezımı paida bolady.  

Al 2022 jyldyŋ 4 şıldesınen bastap, Qa­zaq­stan­da azamattarǧa memlekettık Tu­dy jeke üilerıne, balkonda­ry­na ıluge rūqsat berıldı. Būl öz­­gerıs Qazaqstan Respubli­kasy­nyŋ «Memlekettık rämızder tura­ly» zaŋyna engızılgen tüzetu­ler­den keiın qabyldandy. 

 Memlekettık rämızderge qūrmet tek resmi ıs-şaralarda ǧana emes, kündelıktı ömırde de körınuı tiıs. Memlekettık mekemelerde, oqu oryndarynda, qoǧamdyq oryndarda rämızderdı dūrys ornalastyru, olardyŋ tazalyǧyn saqtau – ärbır azamattyŋ jauapkerşılıgı.  

Al olardy qorlau – zaŋǧa qaişy äreket. Qazaqstan Respublikasynyŋ zaŋnamasyna säikes, rämızderge nemqūraily qarau nemese olardy qorlau äkımşılık jäne qylmystyq jauapkerşılıkke äkeledı. 

Mäselen,  äkımşılık qūqyq būzuşylyq tu­raly kodekstıŋ 458-babyna säi­kes, rämızderdı qor­la­ǧandarǧa 200 AEK (ailyq esep­tık körsetkış) kölemınde aiyp­pūl salynady nemese 15 täulıkke deiın äkımşılık qamauǧa alynady.

Eger rämızderdı qorlau auyr qū­qyqbūzuşylyq retınde tanyl­sa, Qylmystyq kodekstıŋ 372-ba­byna säikes, kınälı tūlǧaǧa ırı kö­lemde aiyppūl salynyp, 2 jyl­ǧa deiın bas bostandyǧynan aiyru jazasy qoldanyluy mümkın. 

Eske salsaq, künı keşe ǧana Atyrauda bet-jüzın tūm­şalap, qara qiıngen qyzdar Qazaqstannyŋ standartqa sai emes tuyn ūstap, fotoǧa tüsken bolatyn.  Qyzdardyŋ būl äreketı äleu­mettık jelıde tarap, qoǧamnyŋ qyzu talqysyna tüstı. Atyrau ob­­lystyq polisiia departa­men­tı­nıŋ mälımetınşe, suretke tüs­ken tört küdıktı anyqtalyp, olar po­lisiia bölımşesıne jetkı­zıl­gen. Artynşa-aq monitoring nätijesınde 2 zaŋbūzuşylyq anyqtalǧan. 

Mädeniet jäne aqparat ministrlıgı pıkır bıldırıp, tudy satqan ekı internet-resursty anyqtady. Bügınde atalǧan mä­sele boiynşa «Memlekettık rä­mızderdı qorlau» babymen qyl­mystyq ıs tırkelıp, sotqa deiıngı ter­geu amaldary jürgızılıp ja­tyr.

Sondyqtan jastardyŋ boiynda patriottyq sezımdı qalyptastyru üşın memlekettık rämızderdıŋ mänın tüsındıru öte maŋyzdy. Äleumettık jelılerde, mädeni şaralarda, bılım beru oryndarynda rämızder turaly aqparat taratyp, jastardy ūlttyq qūndylyqtarǧa jaqyndatu qajet.  

Qazaqstan Prezidentı Qasym-Jomart Toqaev 2022 jyly Memlekettık rämızderdıŋ 30 jyldyǧyna arnalǧan Memlekettık tu köteru saltanatty räsımınde rämızderdıŋ ärbırımızdıŋ jüregımızge maqtanyş ūialatatynyn aitqan bolatyn.

“Qasiettı nyşandarymyzda qazaqtyŋ myŋ jyldyq arman-tılegı, maqsat-mūraty tügel toǧysqan. Tu halqymyz üşın qaşanda erlık pen eldıktıŋ simvoly sanalǧan. Kök türıkter zamanynda babalarymyz börılı bairaqtyŋ töŋıregıne toptasty. Qazaq handyǧynyŋ tuy bükıl ūltty ūiystyrdy, el bırlıgın bekemdedı. Al, ötken ǧasyrda arystarymyz «Alaş tuy astynda, Kün söngenşe sönbeimız!» dep halyqqa jıger berdı.   Köne däuırden miras bolǧan osy dästür ūrpaqtan ūrpaqqa jalǧasyp, bügıngı künge jettı.   Qazaq elınıŋ kögınde Ūly dalanyŋ aibynyn asyrǧan Täuelsızdık tuy jelbıredı. Kök bairaǧymyz – myzǧymas memlekettılıktıŋ belgısı. Eltaŋbamyz – azattyqtyŋ aişyqty körınısı. Al, Änūranymyz – erkındık pen eldıktıŋ ünı. Täuelsızdıktıŋ osy üş simvoly halqymyzǧa erekşe ruh beredı. Ärqaisymyzdyŋ keudemızge maqtanyş ūialatady. Öitkenı, būl – babalarymyzdyŋ oryndalǧan armany”, – dedı Qasym-Jomart Toqaev.

Memlekettık rämızder tek eldıŋ egemendıgın, täuelsızdıgın aiqyndap qana qoimai, ūlttyŋ tarihi jäne mädeni mūrasyn saqtau men damytuda maŋyzdy röl atqarady. Qazaqstannyŋ Tuy, Eltaŋbasy jäne Änūrany – bızdıŋ ūlttyq sanamyzdyŋ ajyramas bölıgı, olar ärbır qazaqstandyq üşın erekşe mänge ie. Rämızderge degen qūrmet, onyŋ taza ärı dūrys ornalastyryluy – memlekettıŋ bolaşaǧyna degen jauapkerşılıktıŋ körınısı. Memlekettık rämızder halyqtyŋ ruhyn köterıp, bırlıgın nyǧaituda basty qūraldardyŋ bırı. Ärbır azamat rämızderdı qūrmettep, olardyŋ män-maǧynasyn ūǧynu arqyly memleket aldyndaǧy azamattyq paryzyn oryndap, ūlttyq qūndylyqtardy nasihattaidy. Sonymen qatar, memlekettık rämızderge nemqūraily qarau nemese olardy qorlau qoǧamdaǧy jalpy etikalyq normalarǧa qaişy bolyp, zaŋmen qudalanady. Qazaqstanda rämızderdıŋ mänı men maŋyzyn tüsındıru, jastardyŋ patriottyq sezımın qalyptastyru ärbır azamattyŋ paryzy ekenın ūmytpauymyz kerek.