دەپۋتاتتار ەلوردانىڭ ەلتاڭباسى مەن تۋىن وزگەرتۋگە ۇسىنىس جاسادى. تۇزەتۋ جوباسى Open NLA پورتالىندا جاريالاندى، دەپ حابارلايدى “ادىرنا” ۇلتتىق پورتالى.
«استانا قالاسىنىڭ ەلتاڭباسى – كوگىلدىر فوندا التىن تۇستەس «بايتەرەك» جانە «شاڭىراق» ەكى سيمۆولى بەينەلەنگەن شەڭبەر. «بايتەرەك» تاڭباسىنىڭ نەگىزىندە «قۇسقاناتى» ويۋ-ورنەگى، ونىڭ تومەنگى بولىگىندە ستيلدەندىرىلگەن «ن» ءارپى، «قۇسقاناتى» ويۋ-ورنەگى جانە «ن» ءارپى التىن ءتۇستى. «شاڭىراق» تاڭباسىنىڭ جانە قۇسقاناتى ويۋىنىڭ سىرتقى جيەكتەرى جاسىل ءتۇستى جيەكتەلگەن. سىرتقى ساقينانىڭ جيەگىندە قىزىل ءتۇستى فوندا سول جانە وڭ جاعىندا التىن تۇستەس «بورىكوز» ويۋى بار. ەلتاڭبانىڭ تومەنگى بولىگىندە التىن تۇستە قىزىل تۇسپەن «استانا» دەگەن جازۋ بار. «استانا» ءسوزىنىڭ سول جانە وڭ جاعىندا ءۇش سيممەتريالى سىزىق – التىن تۇستەرى بار» دەلىنگەن جوبادا.
استانا قالاسىنىڭ تۋى سيپاتتاۋ بويىنشا بىلايشا كورىنەدى: «استانا قالاسىنىڭ تۋى ەنى مەن ۇزىندىعى 1:2 قاتىناسىندا استانا قالاسىنىڭ ەلتاڭباسى بەينەلەنگەن تىك بۇرىشتى كوك ءتۇستى پانەل بولىپ تابىلادى. ورتاسىندا التىن ءتۇستى كۇن ساۋلەلەرى بارلىق جاققا تارايدى».
ەلوردا ءماسليحاتى 2019 جىلى مامىردا بەكىتىلگەن نۇر-سۇلتاننىڭ رامىزدەرىن سيپاتتاماعا سايكەس كەلەتىن جاڭا رامىزدەرگە اۋىستىرۋدى ۇسىنادى.
”ادىرنا” ۇلتتىق پورتالى
