مەملەكەت باسشىسى قاسىم-جومارت توقاەۆ ماڭعىستاۋ وبلىسىنا جۇمىس ساپارىمەن بارىپ، وڭىردە جاڭا كاسىپورىندار اشۋ كەرەكتىگىنە توقتالدى. بۇل تۋرالى "ادىرنا" ۇلتتىق پورتالى جازادى.
«ماڭعىستاۋدىڭ وڭدەۋ ونەركاسىبىن جانە بيزنەس سالاسىن دامىتۋ قاجەت. بۇل ايماق تاۋەلسىزدىگىمىزدىڭ تۇعىرىن نىعايتۋعا وراسان زور ۇلەس قوستى. مۇندا ەلىمىزدەگى مۇنايدىڭ تورتتەن ءبىرى وندىرىلەدى. مۇناي-گاز سالاسىمەن قاتار وبلىستا ەكونوميكانىڭ وڭدەۋ ونەركاسىبىن دامىتۋعا مول مۇمكىندىك بار. قازىر مەملەكەت الدىندا تۇرعان نەگىزگى مىندەتتىڭ ءبىرى – ۇلتتىق ەكونوميكانى ءىس-جۇزىندە ءارتاراپتاندىرۋ. سونداي-اق، تەرەڭ وڭدەلگەن دايىن ءونىم شىعاراتىن ءوندىرىس ورىندارىن اشۋ قاجەت. مەن بۇل تۋرالى ۇكىمەت جيىندارىندا، وڭىرلەرگە بارعان كەزدە ۇنەمى ايتىپ ءجۇرمىن. بارلىق اكىمدەر وسى ماسەلەگە باسا نازار اۋدارۋعا ءتيىس. بۇل – ۇكىمەت پەن اكىمدەردىڭ الدىندا تۇرعان ماڭىزدى مىندەت. وبلىستا سوڭعى بەس جىل بويى بىرقاتار ءىرى ءوندىرىس ورىندارى توقتاپ تۇر. بۇل جاعداي جۇمىسسىز قالعان ازاماتتار اراسىندا نارازىلىق تۋعىزعانىن جاقسى تۇسىنەمىن. ۇكىمەت وسى وندىرىستەردى جانداندىرۋ ءۇشىن ءتيىمدى شارالاردى شۇعىل تۇردە قابىلداۋعا ءتيىس. قاجەت بولسا، جاڭا ءونىم شىعارۋ ءۇشىن نارىقتىڭ سۇرانىسىنا ساي بەيىمدەۋ جولدارىن قاراستىرۋ كەرەك. سونىمەن بىرگە، باسەكەگە قابىلەتتى جاڭا كاسىپورىندار اشقان ءجون. 2023-2026 جىلدارى 29 جوبانى جۇزەگە اسىرۋدى جوسپارلاپ وتىرمىز. سونىڭ ناتيجەسىندە 3 مىڭ تۇراقتى جۇمىس ورنى اشىلادى. ۇكىمەتكە جانە اكىمدىككە بارلىق جوبالاردىڭ ۋاقىتىلى اياقتالۋىن قامتاماسىز ەتۋدى تاپسىرامىن»، - دەدى توقاەۆ.
"ادىرنا" ۇلتتىق پورتالى
