باتىس قازاقستان وبلىسىندا ۇستازدار كۇنىنە ارنالعان سالتاناتتى شارا ءوتتى. مەرەكەلىك جيىن «اتامەكەن» ونەر ورداسىندا تويلاندى. «ۇستازعا تاعزىم – ۇرپاققا امانات»اتتى سالتاناتتى كەشكە سەگىز جۇزدەن اسا سالا ماماندارى شاقىرىلدى.
رۋحاني مازمۇنى تەرەڭ, تاعىلىمى مول مەرەكەلىك شاراعا ءوڭىردىڭ ءبىلىم بەرۋ سالاسىنىڭ ارداگەرلەرى مەن ۇزدىك پەداگوگتەرى, اۋدان-قالالاردان ارنايى شاقىرىلعان قوناقتار مەن جاس ماماندار قاتىستى. مەرەكەلىك كەشتە باتىس قازاقستان وبلىسىنىڭ اكىمى ناريمان تورەعاليەۆ قۇتتىقتاۋ ءسوز سويلەپ, ۇستازدىق قىزمەتتىڭ قوعامداعى ورنى مەن ماڭىزىنا ەرەكشە توقتالدى.
– ماماندىقتى جۇرەك قالاۋىمەن تاڭداعان ءاربىر مۇعالىم – قاجىرلى ەڭبەكتىڭ, سارقىلماس شىدامنىڭ, شەكسىز سۇيىسپەنشىلىكتىڭ يەسى. سوندىقتان دا ۇستاز – قاشاندا قۇرمەت پەن سەنىمنىڭ بيىك تورىندە. ەل ەرتەڭى – جاس ۇرپاقتى تاربيەلەۋ ىسىندە سىزدەردىڭ ەڭبەكتەرىڭىز ولشەۋسىز. ۇستازعا تاعزىم – بولاشاققا جاسالعان ينۆەستيتسيا، – دەدى ايماق باسشىسى ناريمان تورەعاليۇلى.
سالتاناتتى جيىندا ءوڭىردىڭ ءبىرقاتار ۇزدىك پەداگوگتەرى ارنايى ماراپاتتارعا يە بولدى. اتاپ ايتقاندا, تاسقالا اۋدانىنداعى «ساۋلەت» مەكتەپ-ليتسەيىنىڭ ديرەكتورى, ماتەماتيكا ءپانىنىڭ مۇعالىمءى اققانىم بيساليەۆا — «ەرەن ەڭبەگى ءۇشىن» مەدالىمەن, قايدار قاپانوۆ اتىنداعى ورال حالىقارالىق گيمنازياسىنىڭ باس ديرەكتورى قايدار قاپانوۆ — «قازاقستان رەسپۋبليكاسىنىڭ كونستيتۋتسياسىنا 30 جىل» مەرەكەلىك مەدالىمەن, س.سەيفۋللين اتىنداعى №11 وبلىستىق مامانداندىرىلعان مەكتەپ-ليتسەي-ينتەرناتىنىڭ ماتەماتيكا ءپانىنءىڭ مۇعالىمى گۇلميرام مۇساعاليەۆا — «باتىس قازاقستان وبلىسىنىڭ ءبىلىم بەرۋ سالاسىنا قوسقان ۇلەسى ءۇشىن»توسبەلگىسىمەن ماراپاتتالدى.
سونىمەن قاتار كاسىبي مەرەكە قارساڭىندا ءبىر توپ ۇستازدار قر وقۋ-اعارتۋ مينيسترلىگىنىڭ «ەڭبەك ارداگەرى» مەدالىنە, «قۇرمەت گراموتاسىنا», بقو اكىمىنىڭ العىس حاتىنا, سونداي-اق وبلىستىق ءبىلىم باسقارماسىنىڭ «ءبىلىم بەرۋ سالاسىنا قوسقان ۇلەسى ءۇشىن» توسبەلگىسىنە يە بولدى.
ۇستازداردىڭ ەڭبەگى تەك وبلىس كولەمىندە عانا ەمەس, ەل دەڭگەيىندە دە جوعارى باعالاندى. مۇعالىمدەر كۇنىنە وراي ەلوردادا وتكەن سالتاناتتى قابىلداۋدا باتىس قازاقستان وبلىسىنان ءۇش بىردەي ۇستاز جوعارى مەملەكەتتىك ناگرادالارمەن ماراپاتتالدى. بۇل – ءوڭىر پەداگوگتەرىنىڭ ساپالى ءبىلىم مەن تاربيەنى ۇرپاققا سىڭىرۋدەگى تىنىمسىز ەڭبەگىنىڭ جارقىن كورىنىسى.
سالتاناتتى كەش كونتسەرتتىك باعدارلاماعا ۇلاسىپ, ونەرپازدار ۇستازدارعا ارنالعان جۇرەكجاردى اندەر مەن اسەم بي تارتۋ ەتتى.
وسىلايشا, قازان ايىنىڭ العاشقى اپتاسى – ۇستازداردى ۇلىقتاۋعا ارنالعان ەرەكشە كۇندەردىڭ ءبىرءى رەتىندە تاعى دا جارقىن ەستەلىككە اينالدى. ۇستاز اتى – بيىك, مارتەبەسى – ماڭگى. ويتكەنى ولار – بولاشاققا جول سىلتەيتىن شامشىراق.
