"AMANAT" پارتياسى قازاقستاننىڭ سۋ باسقان باتىس ايماعىنا گۋمانيتارلىق كومەك كورسەتۋ ءۇشىن جول تارتتى. بۇل تۋرالى "AMANAT" پارتياسىنىڭ اتقارۋشى حاتشىسى ەلنۇر بەيسەنباەۆ Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
“قۇرمەتتى دوستار! حالىقتى تولعاندىراتىن ماسەلەلەردى شەشۋ – «AMANAT» پارتياسىنىڭ ءبىرىنشى كەزەكتەگى مىندەتى.
وتكەن اپتادا پارتيانىڭ رەسپۋبليكالىق شتابىنىڭ مۇشەلەرى ۇگىت-ناسيحات ناۋقانى كەزىندە باتىس قازاقستان جانە اقتوبە وبلىستارىنا بارىپ، وڭىردەگى سۋ تاسقىنىنىڭ سالدارىن ءوز كوزىمەن كوردى.
«AMANAT» بۇل جاعدايدى ۇنەمى باقىلاۋدا ۇستادى. سوندىقتان داۋىس بەرۋ اياقتالا سالىسىمەن، دەپۋتاتتىققا كانديداتتار دەلەگاتسياسى مەن پارتيا بەلسەندىلەرى سۋ باسقان ۇيلەردىڭ تۇرعىندارىمەن كەزدەسىپ، گۋمانيتارلىق كومەك كورسەتۋ ءۇشىن وسى ايماقتارعا قايتا جول تارتتى. سونداي-اق، اماناتتىقتار ينفراقۇرىلىم نىساندارى مەن جولداردىڭ جاي-كۇيىن تەكسەرەدى. ولار زارداپ شەككەندەردىڭ بارلىعى كەلتىرىلگەن زالال ءۇشىن وتەماقى الىپ، ايماقتاعى جاعدايدى قالپىنا كەلتىرۋ ءۇشىن قاجەتتى كومەك تۋرالى اقپارات جينايدى.
باعدارلامامىزدا ءبىز ەلىمىزدەگى ينفراقۇرىلىمدى جاڭعىرتۋدى، قالا مەن اۋىل تۇرعىندارىن ماۋسىمدىق سۋ تاسقىنىنان قورعاپ، گيدروتەحنيكالىق قۇرىلىستار جۇيەسىندە ءتارتىپ ورناتۋدى كوزدەگەن بولاتىنبىز. پارتيا ءوزىنىڭ سايلاۋالدى باعدارلاماسىن ىسكە اسىرۋعا كىرىسىپ كەتتى جانە بۇگىندە اسا وزەكتى بولىپ وتىرعان ماسەلەنى تىكەلەي توتەنشە جاعداي ورىن العان ايماققا بارىپ شەشپەك. «AMANAT» ءاردايىم حالىقپەن بىرگە!”، دەپ جازدى ول.
