حالىقارالىق World Press Photo بايقاۋىنىڭ 2025 جىلعى جەڭىمپازدارى بەلگىلى بولدى، دەپ حابارلايدى "ادىرنا" ۇلتتىق پورتالى DW-عا سىلتەپ.
بيىل 30 ەلدەن 42 فوتوگرافتىڭ جۇمىسى ۇزدىك دەپ تانىلدى. جۇلدەگە يە بولعاندار اراسىندا بانگلادەش، بەلارۋس، برازيليا، گەرمانيا، فرانتسيا، يتاليا جانە باسقا دا ەلدەردىڭ وكىلدەرى بار.
بيىلعى بايقاۋعا 141 ەلدەن 3778 فوتوگراف 59 320 فوتوسۋرەت ۇسىنعان. بايقاۋدىڭ جەڭىمپازدارى ءار ايماق بويىنشا (ازيا، افريكا، ەۋروپا، سولتۇستىك جانە ورتالىق امەريكا، وڭتۇستىك امەريكا، وڭتۇستىك-شىعىس ازيا جانە وكەانيا) ءۇش نوميناتسيادا انىقتالدى. Open Format نوميناتسياسى بيىلدان باستاپ الىنىپ تاستالدى.
2025 جىلعى جەڭىمپازداردىڭ قاتارىندا رەسەيلىك تاسس اگەنتتىگىنىڭ ءفوتوتىلشىسى ميحايل تەرەششەنكو بار. ونىڭ "گرۋزياداعى نارازىلىقتار" اتتى فوتوجوباسى "فوتورەپورتاج" (Stories) ساناتىندا ۇزدىك دەپ تانىلدى.
بايقاۋ ۇيىمداستىرۋشىلارىنىڭ ايتۋىنشا، بۇل جوبا دەموكراتيالىق ۇستانىمدار مەن نارازىلىق قوزعالىستارىنىڭ ماڭىزدىلىعىن كورسەتەدى.
وتكەن جىلدارى ۋكراينالىق فوتوجۋرناليستەر بايقاۋدا بىرنەشە رەت جەڭىمپاز اتانعان بولاتىن. الايدا بيىل ۋكراينالىق فوتوگرافتاردىڭ جۇمىستارى ۇزدىك دەپ تانىلعان جوق. دەگەنمەن، سوعىستىڭ سالدارىن بەينەلەيتىن بىرنەشە جۇمىس ماراپاتتالدى.
مىسالى، نەمىس فوتوگرافى فلوريان باحمايەر ۋكرايناداعى سوعىس زاردابىن تارتقان التى جاسار انگەلينانىڭ پورترەتىمەن جەڭىسكە جەتتى. سونداي-اق، نەمىس فوتوگرافى ناننا حايتمان دونباسستاعى دالا گوسپيتالىن سۋرەتتەگەن جۇمىسى ءۇشىن ماراپاتتالدى.
جۇلدەگەرلەر اراسىندا بەلورۋس فوتوگرافى تاتيانا چيپسانوۆا دا بار. ول جاڭا زەلاندياداعى ماوري حالقى تۋرالى ۇزاق مەرزىمدى جوباسى ءۇشىن ماراپاتتالدى.
پالەستينالىق فوتوگراف الي دجاداللا ءيزرايلدىڭ گازا سەكتورىنا جاساعان شابۋىلدارىن كورسەتكەن فوتورەپورتاجى ءۇشىن جۇلدەگە يە بولدى.
بارلىق جەڭىمپازداردىڭ جۇمىستارى World Press Photo ءداستۇرلى كورمەسىندە كوپشىلىك نازارىنا ۇسىنىلادى.
