الماتى قالاسىنداعى مامانداندىرىلعان حالىققا قىزمەت كورسەتۋ ورتالىعىندا جۇرگىزۋشى كۋالىگىن الۋ ءۇشىن تاپسىرىلاتىن پراكتيكالىق ەمتيحان كەزىندە جول-كولىك وقيعاسى ورىن الدى، دەپ حابارلايدى "ادىرنا" ۇلتتىق پورتالى.
بۇل تۋرالى "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ ءباسپاسوز قىزمەتى مالىمدەدى.
"الماتىداعى مامانداندىرىلعان حقكو-دا پراكتيكالىق ەمتيحان تاپسىرۋ كەزىندە جول اپاتى بولدى. ابىروي بولعاندا، زارداپ شەككەندەر جوق", – دەلىنگەن حابارلامادا.
مەكەمەنىڭ مالىمەتىنشە، 2024 جىلى ەلىمىز بويىنشا وسىنداي 48 وقيعا تىركەلگەن. كانديداتتار ەمتيحان كەزىندە جول بەلگىلەرىن قاعىپ كەتكەن، بورديۋردەن اسىپ كەتكەن، قورشاۋلارعا سوعىلعان نەمەسە باسقا كولىكتەرمەن قاقتىعىسقان.
ماماندار جۇرگىزۋشى كۋالىگىن الۋعا ۇمىتكەرلەردىڭ جول قوزعالىسى ەرەجەلەرىن مۇقيات ۇيرەنىپ، اۆتوكولىكتى باسقارۋ ماشىعىن جەتىلدىرۋ قاجەتتىگىن ەسكەرتەدى. ءتيىستى مەكەمەلەر اتالعان جاعدايلاردى بولدىرماۋ ءۇشىن قوسىمشا شارالار قابىلداۋ قاجەتتىگىن دە اتاپ ءوتتى.
