بيىل حالىق اقىنى، ءانشى، كومپوزيتور، ونەر قايراتكەرى نارتاي بەكەجانوۆتىڭ تۋعانىنا 135 جىل تولىپ وتىر.
ول – قازاق ونەرىندە وزىندىك ورنى بار ايتىسكەر اقىن، جىراۋ، حالىقتىڭ رۋحاني مۇراسىن ناسيحاتتاۋشى تۇلعا.
نارتاي بەكەجانوۆ 1890 جىلى قازىرگى قىزىلوردا وبلىسى، شيەلى اۋدانىندا دۇنيەگە كەلگەن. جاستايىنان اقىندىق پەن انشىلىككە جاقىن بولعان ول سۋىرىپسالما ونەرىمەن ەل ىشىندە كەڭ تانىلدى. ونىڭ شىعارمالارىندا حالىقتىڭ تۇرمىس-تىرشىلىگى، زامان شىندىعى، ەلدىك ماسەلەلەر كەڭىنەن كورىنىس تاپتى. اقىننىڭ اندەرى ەرەكشە ماقامىمەن، اۋەزدىلىگىمەن جانە تەرەڭ مازمۇنىمەن ەرەكشەلەنەدى.
اقىن 1935 جىلى شيەلى اۋدانىندا كوركەمدىك جەتەكشى بولىپ قىزمەت اتقارىپ، كەيىن قىزىلورداداعى ەسترادالىق-كونتسەرتتىك زالدا جۇمىس ىستەدى. 1939 جىلى قازاق كسر-ءىنىڭ ەڭبەك سىڭىرگەن ونەر قايراتكەرى اتاعىنا يە بولدى. ماسكەۋدە وتكەن بۇكىلوداقتىق اۋىل شارۋاشىلىعى كورمەسىندە، 1946 جىلى قازاق ادەبيەتى مەن ونەرىنىڭ ماسكەۋدەگى دەكاداسىندا، سونداي-اق رەسپۋبليكالىق ايتىستاردا ونەر كورسەتتى.
نارتاي بەكەجانوۆتىڭ شىعارمالارى قازاق ءان ونەرىنىڭ التىن قورىنا ەندى. ونىڭ «تولقىن»، «نارتاي سازى»، «احاۋ، جالعان» سياقتى اندەرى حالىق اراسىندا كەڭىنەن تانىمال. اقىننىڭ شىعارمالارى بىرنەشە رەت جيناق بولىپ جارىق كوردى.
ونەر قايراتكەرى «قۇرمەت بەلگىسى» وردەنىمەن، مەدالدارمەن جانە قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان. اقىننىڭ ءومىرى مەن شىعارماشىلىعى تۋرالى مۇحامەدجان رۇستەموۆ «نارتاي» اتتى بيوگرافيالىق ەڭبەك جازعان.
2010 جىلى قازاقستاندا نارتاي بەكەجانوۆتىڭ 120 جىلدىعى كەڭ كولەمدە اتالىپ ءوتتى.
