21 ناۋرىز كۇنى سولتۇستىك قازاقستان وبلىسى، ءۋاليحانوۆ اۋدانىنا قاراستى قايرات اۋىلىندا بەتون پليتانىڭ قۇلاۋى سالدارىنان 12 جاستاعى بالا قازا تاپتى، دەپ حابارلايدى "ادىرنا" ۇلتتىق پورتالى Orda.kz-كە سىلتەمە جاساپ.
مارقۇمنىڭ وتباسى بۇرىنعى كەڭشاردىڭ متم عيماراتىندا مال ۇستاعان. سول جەردە جۇرگەن بالا قۇلاعان قابىرعانىڭ استىندا قالعان. اۋىر بەتون پليتاسىن تەك تراكتوردىڭ كومەگىمەن كوتەرۋگە مۇمكىندىك بولعان.
سولتۇستىك قازاقستان وبلىسىنىڭ پوليتسيا دەپارتامەنتى دە قايعىلى وقيعانى راستادى. الايدا ولاردىڭ اقپاراتىنا سايكەس، توتەنشە جاعداي جەكەمەنشىك ءۇيدىڭ اۋلاسىندا ورىن العان.
"21 ناۋرىز كۇنى ساعات 19:35 شاماسىندا ءۋاليحانوۆ اۋدانى قايرات اۋىلىندا جەكەمەنشىك ءۇيدىڭ اۋلاسىندا ساراي قابىرعاسىنىڭ قۇلاۋى سالدارىنان 12 جاستاعى بالا كوز جۇمدى. ول العان جاراقاتتارىنىڭ سالدارىنان وقيعا ورنىندا جان ءتاسىلىم ەتتى. اتالعان فاكتى بويىنشا قىلمىستىق ءىس تىركەلىپ، تەرگەۋ امالدارى جۇرگىزىلۋدە", – دەپ حابارلادى سقو پوليتسيا دەپارتامەنتىنىڭ ءباسپاسوز قىزمەتى.
قايرات اۋىلىندا كەڭەس وداعى داۋىرىندە سالىنعان، قازىرگى ۋاقىتتا يەسىز قالعان جانە جارتىلاي قيراعان بىرنەشە عيمارات بار. جەرگىلىكتى تۇرعىندار مۇنداي قايعىلى جاعدايلاردىڭ قايتالانۋ قاۋپى بار ەكەنىن ايتىپ، الاڭداۋشىلىق ءبىلدىردى.
