تۇركيانىڭ سىرتقى ىستەر مينيسترلىگى 21 ناۋرىز كۇنى فونبيتا اۋىلىندا بولعان لاڭكەستىك شابۋىلعا بايلانىستى نيگەر بيلىگى مەن حالقىنا كوڭىل ايتتى، دەپ حابارلايدى "ادىرنا" ۇلتتىقق پورتالى.
«21 ناۋرىز كۇنى نيگەردىڭ تيللابەرري ايماعىندا ورنالاسقان فونبيتا اۋىلىندا بولعان لاڭكەستىك شابۋىلدان 40-تان استام ادامنىڭ قازا تاپقانىن جانە كوپتەگەن ادامنىڭ جارالانعانىن ۇلكەن كۇيزەلىسپەن قابىلدادىق»، – دەلىنگەن تۇركيا ءسىم مالىمدەمەسىندە.
انكارا بۇل شابۋىلدى قاتاڭ ايىپتادى.
«ءبىز بۇل جانتۇرشىگەرلىك لاڭكەستىك ارەكەتتى ايىپتايمىز. نيگەر حالقىنا كوڭىل ايتامىز، قازا تاپقاندارعا اللانىڭ راقىمىن، جارالانعاندارعا تەز ساۋىعىپ كەتۋىن تىلەيمىز»، – دەپ اتاپ ءوتتى تۇركيانىڭ سىرتقى ساياسي ۆەدومستۆوسى.
نيگەر ىشكى ىستەر ءمينيسترى مۇحامەد تۋمبانىڭ مالىمەتىنشە، فونبيتا اۋىلىنداعى مەشىت شابۋىلعا ۇشىراعان. سالدارىنان 44 ادام قازا تاۋىپ، 13 ادام جاراقات العان. ولاردىڭ تورتەۋىنىڭ جاعدايى اۋىر.
شابۋىلعا دايش لاڭكەستىك ۇيىمىمەن بايلانىسى بار سودىرلار جاۋاپتى دەپ تانىلدى.
نيگەر بيلىگى ەلدە ءۇش كۇندىك ۇلتتىق ازا تۇتۋ كۇنىن جاريالادى. سوڭعى جىلدارى نيگەر، مالي جانە بۋركينا-فاسو سياقتى ساحەل ايماعىنداعى ەلدەر دايش پەن «ال-كايدا» لاڭكەستىك توپتارىمەن بايلانىستى راديكالدى ۇيىمداردىڭ شابۋىلىنا ءجيى ۇشىراپ كەلەدى.
