Túrkııanyń syrtqy ister mınıstrligi 21 naýryz kúni Fonbıta aýylynda bolǵan lańkestik shabýylǵa baılanysty Nıger bıligi men halqyna kóńil aıtty, dep habarlaıdy "Adyrna" ulttyqq portaly.
«21 naýryz kúni Nıgerdiń Tıllaberrı aımaǵynda ornalasqan Fonbıta aýylynda bolǵan lańkestik shabýyldan 40-tan astam adamnyń qaza tapqanyn jáne kóptegen adamnyń jaralanǵanyn úlken kúızelispen qabyldadyq», – delingen Túrkııa SIM málimdemesinde.
Ankara bul shabýyldy qatań aıyptady.
«Biz bul jantúrshigerlik lańkestik áreketti aıyptaımyz. Nıger halqyna kóńil aıtamyz, qaza tapqandarǵa Allanyń raqymyn, jaralanǵandarǵa tez saýyǵyp ketýin tileımiz», – dep atap ótti Túrkııanyń syrtqy saıası vedomstvosy.
Nıger ishki ister mınıstri Muhamed Týmbanyń málimetinshe, Fonbıta aýylyndaǵy meshit shabýylǵa ushyraǵan. Saldarynan 44 adam qaza taýyp, 13 adam jaraqat alǵan. Olardyń tórteýiniń jaǵdaıy aýyr.
Shabýylǵa DAISh lańkestik uıymymen baılanysy bar sodyrlar jaýapty dep tanyldy.
Nıger bıligi elde úsh kúndik ulttyq aza tutý kúnin jarııalady. Sońǵy jyldary Nıger, Malı jáne Býrkına-Faso sııaqty Sahel aımaǵyndaǵy elder DAISh pen «Al-Kaıda» lańkestik toptarymen baılanysty radıkaldy uıymdardyń shabýylyna jıi ushyrap keledi.
