ۋكراينانىڭ قارۋلى كۇشتەرى رەسەي پرەزيدەنتى ۆلاديمير پۋتينءنىڭ رەزيدەنتسياسىنا الىس قاشىقتىققا ۇشاتىن دروندارمەن شابۋىل جاسادى. بۇل تۋرالى رەسەي باسشىسىنىڭ كومەكشىسى يۋري ۋشاكوۆ مالىمدەدى، دەپ حابارلايدى «ادىرنا» ءتىلشىسى APA اگەنتتىگىنە سىلتەمە جاساپ.
ۋشاكوۆتىڭ ايتۋىنشا، كيەۆ نوۆگورود وبلىسىندا ورنالاسقان رەسەي پرەزيدەنتىنىڭ رەزيدەنتسياسىنا الىس قاشىقتىقتاعى ۇشقىشسىز ۇشۋ اپپاراتتارىن كەڭ كولەمدە قولدانا وتىرىپ، تەرروريستىك شابۋىل ۇيىمداستىرعان.
ال رەسەيدىڭ سىرتقى ىستەر ءمينيسترى سەرگەي لاۆروۆ 29 جەلتوقسانعا قاراعان ءتۇنى 91 ۇشقىشسىز اپپاراتتىڭ شابۋىلى بولعانىن ايتتى. بارلىق درون اۋە شابۋىلىنا قارسى قورعانىس كۇشتەرى تاراپىنان جويىلعان. مينيستر ۋكراينا ارەكەتتەرى جاۋاپسىز قالمايتىنىن، جاۋاپ سوققىلارىنىڭ نىساندارى مەن ۋاقىتى انىقتالعانىن اتاپ ءوتتى.
ۋكراينا پرەزيدەنتى ۆلاديمير زەلەنسكي شابۋىل تۋرالى مالىمدەمەنى جالعان دەپ اتاپ، ونى رەسەيدىڭ كيەۆتەگى ۇكىمەتتىك كۆارتالعا سوققى بەرۋگە دايىندالىپ جاتقانىمەن بايلانىستىردى.
ء«بىز بەن امەريكا اراسىندا جانجال بولماي، كەرىسىنشە، ىلگەرىلەۋ بايقالسا، بۇل ورىستار ءۇشىن ساتسىزدىك سانالادى. ويتكەنى ولار بۇل سوعىستىڭ اياقتالعانىن قالامايدى»،-دەدى باسشى.
ۋكراينا پرەزيدەنتىنىڭ پىكىرىنشە، ماسكەۋ مۇنداي مالىمدەمەلەر ارقىلى كيەۆ پەن ۆاشينگتون اراسىنداعى بەيبىت كەلىسسوزدەردە قول جەتكىزىلگەن پروگرەستى بۇزۋعا تىرىسىپ وتىر. وسىعان بايلانىستى ول ترامپتى «رەسەيدىڭ قوقان-لوققىلارىنا تيىسىنشە جاۋاپ بەرۋگە» شاقىردى.
ەسكە سالايىق، 29 جەلتوقسانعا قاراعان ءتۇنى فلوريدادا ۋكراينا مەن اقش پرەزيدەنتتەرى كەزدەسكەن ەدى. تاراپتار ۋكراينا باسشىسى ۇسىنعان 20 تارماقتان تۇراتىن بەيبىت جوسپاردىڭ جەكەلەگەن اسپەكتىلەرىن تالقىلادى. كەزدەسۋ قورىتىندىسى بويىنشا اق ءۇي باسشىسى بەيبىت جوسپاردىڭ شامامەن 90 پايىزى كەلىسىلگەنىن جەتكىزدى.
