Mańǵystaý memlekettik tarıhı-mádenı qoryǵy aýmaǵynda ornalasqan Shopan-ata jerasty meshitiniń qudyǵyn izdeý magnıtimen zerttemek bolǵan aqtaýlyq qazyna izdeýshige bul aımaqty zertteýge resmı túrde tyıym salyndy, dep habarlaıdy "Adyrna" ulttyq portaly Lada.kz saıtyna siltep.
Er adam Shopan-ata kıeli-eskertkish keshenindegi qudyqty zertteýge ruqsat surap, ótinish jazǵan.
Qazyna izdeýshiniń aıtýynsha, jerasty meshitin kóptegen zııaratshylar kelip kórgen. Jergilikti qarııalardyń sózinshe, qudyqtyń ishinen buryn eki shelek tıyn jınalǵan.
Alaıda ótinish ıesine qudyqtyń túbin zertteýge ruqsat berilmedi. Resmı jaýapta Shopan-ata jerasty meshiti respýblıkalyq mańyzy bar tarıhı-mádenı eskertkishter tizimine engizilgeni jáne ony aldaǵy ýaqytta IýNESKO-nyń Dúnıejúzilik mádenı jáne tabıǵı muralar tizimine qosý máselesi qarastyrylyp jatqany aıtylǵan.
"Qudyqtyń ishinde qandaı da bir zattardyń bar-joǵyn anyqtaý úshin arnaıy zertteý jumystary qajet, óıtkeni kez kelgen basqa áreket tarıhı-mádenı mura obektisiniń saqtalýyna qaýip tóndirýi múmkin. Mundaı jumystardy tek lıenzııasy bar mekemeler júrgize alady. Basqa tulǵalar jaýapkershilikke tartylady", – delingen resmı hatta.
Sonymen qatar Balýanııaz Músirepuly kesenesindegi qudyqty (burynǵy ataýy – Qaraǵan bosaǵa úńgiri) zertteýge de ruqsat berilmegen. Sebebi bul nysan da respýblıkalyq mańyzy bar tarıhı-mádenı eskertkishter qataryna kiredi.
Aıta keteıik, qazyna izdeýshiniń aıtýynsha, 1856 jyly bul jerde 200 túrikmen men 60 adaı batyry arasynda qandy shaıqas bolǵan. Sol urysta halyq batyry Balýanııaz Músirepuly qaza tapqan.
