قازاقستان ۇلتتىق فۋتبول قۇراماسىنىڭ باس باپكەرى ستانيسلاۆ چەرچەسوۆتىڭ قىزمەتىنەن كەتەتىنى تۋرالى اقپارات تارادى. ونىڭ ورنىنا ۇمىتكەرلەر قاراستىرىلىپ جاتىر. بۇل تۋرالى E.Maulen تەلەگرام ارناسى جازدى، دەپ حابارلايدى “ادىرنا” ۇلتتىق پورتالى.
بۇل شەشىمدى قفف جاڭا پرەزيدەنتى قابىلدادى. ونىڭ ورنىنا ەكى قازاقستاندىق جانە ەكى ەۋروپالىق ماماننىڭ كانديداتۋراسى قاراستىرىلىپ جاتىر.
قازىر زاڭگەرلەر چەرچەسوۆتىڭ كەلىسىمشارتىن زاڭدى تۇردە بۇزۋدىڭ مۇمكىندىكتەرىن زەرتتەۋ ۇستىندە.
چەرچەسوۆ قازاقستان قۇراماسىنىڭ تىزگىنىن 2024 جىلدىڭ شىلدە ايىندا ۇستادى. ونىڭ كەلىسىمشارتى ءام-2026 ىرىكتەۋ كەزەڭى اياقتالعانشا ارەكەت ەتەدى.
رەسەيلىك ماماننىڭ جەتەكشىلىگىمەن قازاقستان سەگىز رەسمي كەزدەسۋ وتكىزىپ، جەتەۋىندە جەڭىلىس تاپتى. ۋەفا ۇلتتار ليگاسىندا ءوز توبىندا سوڭعى ورىنعا يە بولدى.
