تۋريزم جانە سپورت ءمينيسترى ەربول مىرزابوسىنوۆ الماتىدا وتەتىن «قايرات» پەن «رەال مادريد» اراسىنداعى چەمپيوندار ليگاسى ويىنىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
«قازىر بار نازاردى ءوز الاڭىمىزدا وتەتىن ماتچقا دايىندىققا اۋدارىپ وتىرمىز. الماتىداعى ستاديون ۋەفا-نىڭ ءتورتىنشى ساناتتاعى ارەناسى، ستاندارتتارعا سايكەس كەلەدى. ويىندى سوندا وتكىزەمىز»، – دەدى مينيستر پارلامەنت كۋلۋارىندا.
ونىڭ ايتۋىنشا، ماتچقا ۋەفا كۆوتاسىنا سايكەس 4–5 مىڭ تۋريست كەلۋى مۇمكىن. بۇعان دەيىن دە ستاديوندا ءىرى ءىس-شارالار وتكەنىن اتاپ ءوتتى.
بيلەت قۇنىنا قاتىستى ەربول مىرزابوسىنوۆ: «بۇل – كلۋب پەن ۋەفا اراسىنداعى كەلىسىم. مەملەكەتتىڭ ارالاسۋعا قۇقىعى جوق. بارلىق اقپارات كلۋبتىڭ رەسمي سايتىندا جاريالانادى»، – دەدى.
ەسكە سالايىق، «قايرات» – «رەال مادريد» ماتچى 30 قىركۇيەكتە الماتىدا وتەدى. بۇعان دەيىن ويىن بيلەتتەرىنە قاتىستى جالعان اقپارات تاراعان ەدى.
