Qazaqstan ūlttyq qūramasynyŋ būrynǧy bas bapkerı Stanislav Cherchesov 2026 jylǧy Älem chempionatynyŋ ırıkteu kezeŋınde Uels jäne Lihtenştein qūramalarymen ötetın maŋyzdy matchtar aldynda futbolşylarǧa qoldau bıldırıp, qazaqstandyq janküierlerdı Nauryz merekesımen qūttyqtady, dep habarlaidy “Adyrna” ūlttyq portaly.
“Qazaqstan qūramasyna aldaǧy ırıkteu matchtarynda sättılık tıleimın! Ötken jylǧy täjıribemız ben jaŋa jattyqtyruşylar ştabynyŋ közqarasy komandaǧa jaqsy nätije körsetuge kömektesedı dep senemın. Sonymen qatar, osy mümkındıktı paidalanyp, barlyq qazaqstandyq futbol janküierlerın Nauryz merekesımen jäne köktemnıŋ keluımen qūttyqtaimyn! Barşaŋyzǧa quanyş pen jarqyn sätter tıleimın!” – dep jazdy Cherchesov öz äleumettık jelıdegı paraqşasynda.
Qazaqstan ūlttyq qūramasy 22 nauryzdan 23 nauryzǧa qaraǧan tünı, saǧat 00:45-te Kardiffte Uelspen kezdesedı. Būl oiyn 2026 jylǧy Älem chempionatyna ırıkteu kezeŋındegı maŋyzdy matchtardyŋ bırı bolmaq.
Eske salaiyq, Stanislav Cherchesov 2024 jyldyŋ şılde aiynda Qazaqstan qūramasynyŋ bas bapkerı qyzmetıne taǧaiyndalǧan bolatyn. Alaida ol jurnalisterdıŋ qazaq tılınde qoiǧan sūraǧyna jauap bere almai, “Sen fransuzşa söilep tūrsyŋ ba?” dep äzıldegen edı. Osy äreketı üşın Qazaqstan futbol federasiiasy oǧan memlekettık tıldıŋ maŋyzyn tüsındırıp, 200 AEK (738 400 teŋge) kölemınde aiyppūl salǧan.
Cherchesov qazaq tılın üirenuı ekıtalai ekenın aitqanymen, qajet sözderdı bıletının atap ötken.
Ūqsas jaŋalyqtar
