اباي وبلىسىندا ۇلىستىڭ ۇلى كۇنى — ناۋرىز مەيرامى بيىل كەڭ كولەمدە جانە ەرەكشە فورماتتا اتاپ وتىلۋدە.
توي-دۋمان تەك 22 ناۋرىزبەن شەكتەلمەي، مەرەكەنى ۇلتتىق جاڭعىرۋ كەزەڭىنە اينالدىرۋ ماقساتىندا مەملەكەت باسشىسى 2024 جىلى بەكىتكەن «ناۋرىزناما» تۇجىرىمداماسىنا سايكەس ناۋرىزناما ونكۇندىگى اياسىندا ۇيىمداستىرىلدى. بۇل كۇندەرى وڭىردە ۇلتتىق سالت-داستۇرلەرىمىز جاڭعىرىپ، مادەني، قايىرىمدىلىق جانە اعارتۋشىلىق ءىس-شارالار وتكىزىلدى.
وبلىس ورتالىعى — سەمەي قالاسىنداعى ناۋرىز مەيرامىنىڭ شارالار لەگى ورتالىق الاڭدا «قۇتتى بولسىن، ءاز ناۋرىز!» تەاترلاندىرىلعان قويىلىمىمەن باستالدى. تەاترلاندىرىلعان قويىلىم بارىسىندا «سەلت ەتكىزەر»، «ات تەرگەۋ»، «كورىسۋ»، «الاستاۋ» راسىمدەرى حالىق نازارىنا ۇسىنىلدى.
اباي وبلىسىنىڭ اكىمى بەرىك ءۋالي ءوڭىر جۇرتشىلىعىن ناۋرىز مەيرامىمەن قۇتتىقتادى.
«مەملەكەت باسشىسى «بابالارىمىز ەجەلگى زاماننان بەرى ۇلىس كۇنىن جىل باسى رەتىندە اتاپ وتكەن. قازىر ءاز-ناۋرىز كۇللى حالىققا ورتاق، جالپىۇلتتىق مەرەكەگە اينالدى. ونى ۇلتىنا، دىنىنە قاراماستان بارشا جۇرتىمىز ەرەكشە كۇتەدى، بىرگە اتاپ وتەدى» - دەپ ايتقانداي، ناۋرىز — بارشا قازاقستاندىقتاردىڭ سۇيىكتى مەيرامى. ول حالقىمىزدىڭ بولمىسى مەن دۇنيەتانىمىن، بىرلىگى مەن تاتۋلىعىن ايشىقتايتىن، ادامزاتقا ورتاق ىزگىلىك قۇندىلىقتارىن دارىپتەيتىن ەرەكشە كۇن» دەدى ايماق باسشىسى.
وبلىس اكىمى قۇتتىقتاۋ سوزىندە 11 ناۋرىزدا پرەزيدەنت قابىلداۋىندا بولعاندا مەملەكەت باسشىسى ءوڭىردىڭ وزەكتى ماسەلەلەرىنە كوڭىل ءبولىپ، ءتيىستى تاپسىرمالار بەرگەنىن جەتكىزدى. پرەزيدەنتتىڭ قولداۋىمەن سەمەي قالاسىندا وبلىستىق اۋرۋحانا، جاڭا تەاتر سالىنادى. سەمەيدەگى وقۋشىلار سارايىنىڭ قۇرىلىسىن اياقتاۋعا 8,6 ميلليارد تەڭگە قارجى بولىنەدى.
«سونداي-اق، ۇلى ابايدىڭ 180 جىلدىعىنا تارتۋ رەتىندە، ەلىمىزدىڭ ءار ءوڭىرى وبلىسىمىزعا سىيلىق جاساپ، الەۋمەتتىك نىسانداردى جاڭارتۋ-جاڭعىرتۋعا كومەكتەسۋىن وتىنگەن ۇسىنىسىمىزدى ەل پرەزيدەنتى قولدادى. قازىردىڭ وزىندە كەيبىر وبلىستار ىقىلاسىن ءبىلدىرىپ، حابارلاسا باستادى. بۇيىرسا بيىل جاز بويى سەمەي قالاسى ۇلكەن قۇرىلىس الاڭىنا اينالادى. مۇنىڭ ءبارى ءوڭىرىمىزدىڭ ەڭسەسىن كوتەرىپ، دامۋىن جەدەلدەتە تۇسپەك. اباي وبلىسى حالقىنىڭ قولداۋىمەن الدا تالاي اۋقىمدى جوبالاردى اتقارىپ، ءوڭىردى بىرگە كوركەيتەمىز دەپ سەنەمىن. ءوڭىرىمىز قاشاندا ۇلتتىق قۇندىلىقتاردى كوز قاراشىعىنداي قاستەرلەپ، اتا ءداسۇر مەن زامان دامۋىن ۇشتاستىرىپ كەلە جاتقان جاقسىلىققا قۇشتار، جاڭالىققا اشىق ايماق. ۇلى ابايدىڭ مەكەنى، ابايدىڭ ىزگى جولىن جالعاستىرعان الاش ارىستارىنىڭ ورتالىعى بولعان قاسيەتتى جەر. ۇلىستىڭ ۇلى كۇنىندە ءار شاڭىراققا قۇت-بەرەكە، اماندىق، ىرىس-نەسىبە تىلەيمىن. ناۋرىزناما ونكۇندىگى يگى باستامالارعا سەرپىن بەرسىن. ۇلىق مەيرام جاقسىلىعىمەن كەلىپ، ەلدىگىمىزدى نىعايتىپ، مەرەيىمىزدى ءوسىرسىن» دەدى ايماق باسشىسى.
ناۋرىز مەيرامىنا وراي وبلىس بويىنشا 300-گە جۋىق كيىز ءۇي تىگىلدى. ونىڭ 50-دەن استامى سەمەيدىڭ ورتالىق الاڭى، قالانىڭ قاراعايلى، اۋەزوۆ الاڭى مەن تەمىرجول ۆوكزالى، سيليكات، تەرى-بىلعارى زاۋىتى اۋداندارى، شىعىس، بوبروۆكا جانە يۋنوست كەنتتەرىندە ورنالاستىرىلدى. ءار كيىز ۇيگە اباي اۋىلى، شاكارىم اۋىلى، دوستىق اۋىلى، مەيىرىم اۋىلى، ونەرپازدار اۋىلى، رۋحانيات اۋىلى، ءبىلىم ورداسى، ارداگەرلەر اۋىلى، شاپاعات، جاسىل ەل، تابىس، بولاشاق، ساۋلەت، زاڭ مەن ءتارتىپ، اۋىلىم – التىن بەسىگىم، ب.مومىشۇلىنىڭ تۋعانىنا 110 جىل، ن.تىلەنديەۆتىڭ تۋعانىنا 100 جىل، ش.قالداياقوۆتىڭ تۋعانىنا 95 جىل، ءى.ەسەنبەرليننىڭ تۋعانىنا 120 جىل، ش.ابەنوۆتىڭ تۋعانىنا 125 جىل، ج.ناجىمەدەنوۆتىڭ تۋعانىنا 90 جىل، قر كونستيتۋتسيانىڭ 30 جىلدىعى دەگەن ارنايى اتاۋلار بەرىلگەن.
وبلىس اكىمى ورتالىق الاڭداعى كيىز ۇيلەردى ارالاپ، ناۋرىز مەيرامىنىڭ باستى وقيعاسى – تۇساۋكەسەر راسىمىنە قاتىستى. ۇلى ابايدىڭ 180 جىلدىق مەرەيتويىنا وراي وڭىردە ءبىر مەزەتتە 180 بالا جاڭا ومىرگە قادام باستى. ال سەمەيدە ايماق باسشىسى زيالى قاۋىم، مادەنيەت، ءبىلىم، سپورت، كاسىپكەرلىك، باسقا دا سالا وكىلدەرىمەن بىرگە 40-قا جۋىق ءبۇلدىرشىننىڭ تۇساۋىن كەستى.
22 ناۋرىز كۇنى مەرەكەلىك شارالار وبلىستىڭ بارلىق اۋداندارى مەن قالانىڭ بارلىق شاعىن اۋداندارىن قامتىدى. سەمەي قالاسى ناۋرىزدى كەڭ كولەمدە اتاپ ءوتۋ ءۇشىن مازمۇندى باعدارلاما ازىرلەدى. ورتالىق الاڭدا قولونەر كورمەلەرى، ۇلتتىق ويىندار، سپورتتىق جارىستار، فوتوايماقتار دايىندالدى.
مەرەكەنىڭ كوركىن كەلتىرگەن شارانىڭ ءبىرى - كومپوزيتور نۇرعيسا تىلەنديەۆتىڭ 100 جىلدىعىنا وراي ءجۇز جاس دومبىراشىنىڭ سازگەر شىعارمالارىن ءبىر مەزگىلدە ورىنداۋى. بۇل جۇرتشىلىققا مۋزىكا مەن تاريحي تاعىلىمعا تولى ەرەكشە اتموسفەرا سىيلادى.
سەمەيلىكتەر مەن قالا قوناقتارى ورتالىق الاڭدا قازاقستاندىق ەسترادا جۇلدىزدارى «الاشۇلى»، «مۋزارت» توبى مەن ءا.قاشاۋباەۆ اتىنداعى مەملەكەتتىك فيلارمونياسىنىڭ، قالالىق مادەنيەت سارايى انشىلەرىنىڭ ونەرىن تاماشالادى.
كەشكى باعدارلاما اياسىندا «الاشۇلى» توبى، «ادەمى-اي» دۋەتى مەن قايرات نۇرتاس، جەرگىلىكتى ونەرپازدار ونەر كورسەتەتىن بولادى.
