Abaı oblysynda Ulystyń uly kúni — Naýryz meıramy bıyl keń kólemde jáne erekshe formatta atap ótilýde.
Toı-dýman tek 22 naýryzben shektelmeı, merekeni ulttyq jańǵyrý kezeńine aınaldyrý maqsatynda Memleket basshysy 2024 jyly bekitken «Naýryznama» tujyrymdamasyna sáıkes Naýryznama onkúndigi aıasynda uıymdastyryldy. Bul kúnderi óńirde ulttyq salt-dástúrlerimiz jańǵyryp, mádenı, qaıyrymdylyq jáne aǵartýshylyq is-sharalar ótkizildi.
Oblys ortalyǵy — Semeı qalasyndaǵy Naýryz meıramynyń sharalar legi ortalyq alańda «Qutty bolsyn, áz Naýryz!» teatrlandyrylǵan qoıylymymen bastaldy. Teatrlandyrylǵan qoıylym barysynda «selt etkizer», «at tergeý», «kórisý», «alastaý» rásimderi halyq nazaryna usynyldy.
Abaı oblysynyń ákimi Berik Ýálı óńir jurtshylyǵyn Naýryz meıramymen quttyqtady.
«Memleket basshysy «Babalarymyz ejelgi zamannan beri Ulys kúnin jyl basy retinde atap ótken. Qazir Áz-Naýryz kúlli halyqqa ortaq, jalpyulttyq merekege aınaldy. Ony ultyna, dinine qaramastan barsha jurtymyz erekshe kútedi, birge atap ótedi» - dep aıtqandaı, Naýryz — barsha qazaqstandyqtardyń súıikti meıramy. Ol halqymyzdyń bolmysy men dúnıetanymyn, birligi men tatýlyǵyn aıshyqtaıtyn, adamzatqa ortaq izgilik qundylyqtaryn dáripteıtin erekshe kún» dedi aımaq basshysy.
Oblys ákimi quttyqtaý sózinde 11 naýryzda Prezıdent qabyldaýynda bolǵanda Memleket basshysy óńirdiń ózekti máselelerine kóńil bólip, tıisti tapsyrmalar bergenin jetkizdi. Prezıdenttiń qoldaýymen Semeı qalasynda oblystyq aýrýhana, jańa teatr salynady. Semeıdegi Oqýshylar saraıynyń qurylysyn aıaqtaýǵa 8,6 mıllıard teńge qarjy bólinedi.
«Sondaı-aq, uly Abaıdyń 180 jyldyǵyna tartý retinde, elimizdiń ár óńiri oblysymyzǵa syılyq jasap, áleýmettik nysandardy jańartý-jańǵyrtýǵa kómektesýin ótingen usynysymyzdy el Prezıdenti qoldady. Qazirdiń ózinde keıbir oblystar yqylasyn bildirip, habarlasa bastady. Buıyrsa bıyl jaz boıy Semeı qalasy úlken qurylys alańyna aınalady. Munyń bári óńirimizdiń eńsesin kóterip, damýyn jedeldete túspek. Abaı oblysy halqynyń qoldaýymen alda talaı aýqymdy jobalardy atqaryp, óńirdi birge kórkeıtemiz dep senemin. Óńirimiz qashanda ulttyq qundylyqtardy kóz qarashyǵyndaı qasterlep, ata dásúr men zaman damýyn ushtastyryp kele jatqan jaqsylyqqa qushtar, jańalyqqa ashyq aımaq. Uly Abaıdyń mekeni, Abaıdyń izgi jolyn jalǵastyrǵan alash arystarynyń ortalyǵy bolǵan qasıetti jer. Ulystyń uly kúninde ár shańyraqqa qut-bereke, amandyq, yrys-nesibe tileımin. Naýryznama onkúndigi ıgi bastamalarǵa serpin bersin. Ulyq meıram jaqsylyǵymen kelip, eldigimizdi nyǵaıtyp, mereıimizdi ósirsin» dedi aımaq basshysy.
Naýryz meıramyna oraı oblys boıynsha 300-ge jýyq kıiz úı tigildi. Onyń 50-den astamy Semeıdiń ortalyq alańy, qalanyń Qaraǵaıly, Áýezov alańy men temirjol vokzaly, Sılıkat, Teri-bylǵary zaýyty aýdandary, Shyǵys, Bobrovka jáne Iýnost kentterinde ornalastyryldy. Ár kıiz úıge Abaı aýyly, Shákárim aýyly, Dostyq aýyly, Meıirim aýyly, Ónerpazdar aýyly, Rýhanııat aýyly, Bilim ordasy, Ardagerler aýyly, Shapaǵat, Jasyl el, Tabys, Bolashaq, Sáýlet, Zań men tártip, Aýylym – altyn besigim, B.Momyshulynyń týǵanyna 110 jyl, N.Tilendıevtiń týǵanyna 100 jyl, Sh.Qaldaıaqovtyń týǵanyna 95 jyl, I.Esenberlınniń týǵanyna 120 jyl, Sh.Ábenovtiń týǵanyna 125 jyl, J.Nájimedenovtiń týǵanyna 90 jyl, QR Konstıtýııanyń 30 jyldyǵy degen arnaıy ataýlar berilgen.
Oblys ákimi ortalyq alańdaǵy kıiz úılerdi aralap, Naýryz meıramynyń basty oqıǵasy – tusaýkeser rásimine qatysty. Uly Abaıdyń 180 jyldyq mereıtoıyna oraı óńirde bir mezette 180 bala jańa ómirge qadam basty. Al Semeıde aımaq basshysy zııaly qaýym, mádenıet, bilim, sport, kásipkerlik, basqa da sala ókilderimen birge 40-qa jýyq búldirshinniń tusaýyn kesti.
22 naýryz kúni merekelik sharalar oblystyń barlyq aýdandary men qalanyń barlyq shaǵyn aýdandaryn qamtydy. Semeı qalasy Naýryzdy keń kólemde atap ótý úshin mazmundy baǵdarlama ázirledi. Ortalyq alańda qolóner kórmeleri, ulttyq oıyndar, sporttyq jarystar, fotoaımaqtar daıyndaldy.
Merekeniń kórkin keltirgen sharanyń biri - kompozıtor Nurǵısa Tilendıevtiń 100 jyldyǵyna oraı júz jas dombyrashynyń sazger shyǵarmalaryn bir mezgilde oryndaýy. Bul jurtshylyqqa mýzyka men tarıhı taǵylymǵa toly erekshe atmosfera syılady.
Semeılikter men qala qonaqtary ortalyq alańda qazaqstandyq estrada juldyzdary «Alashuly», «MýzArt» toby men Á.Qashaýbaev atyndaǵy memlekettik fılarmonııasynyń, qalalyq mádenıet saraıy ánshileriniń ónerin tamashalady.
Keshki baǵdarlama aıasynda «Alashuly» toby, «Ádemi-aı» dýeti men Qaırat Nurtas, jergilikti ónerpazdar óner kórsetetin bolady.
