الماتىدا ناۋرىز مەيرامى اياسىندا اباي قۇنانبايۇلىنىڭ 180 جىلدىعىنا ارنالعان ەرەكشە مادەني شارا ءوتتى. قالا اكىمدىگىنىڭ مالىمەتىنشە، 5000-نان استام ادام ابايدىڭ ايگىلى «كوزىمنىڭ قاراسى» مەن «جەلسىز تۇندە جارىق اي» اندەرىن ءبىر ۋاقىتتا ورىنداپ، قازاقتىڭ ۇلى اقىنىنىڭ مۇراسىن ۇلىقتادى، دەپ حابارلايدى "ادىرنا" ۇلتتىق پورتالى.
شارا اباي داڭعىلى بويىندا ۇيىمداستىرىلدى. بايقاداموۆ اتىنداعى مەملەكەتتىك حور كاپەللاسىنىڭ ارتىستەرى، پ.چايكوۆسكي اتىنداعى الماتى مۋزىكالىق كوللەدجىنىڭ ستۋدەنتتەرى، قۇرمانعازى اتىنداعى قازاق ۇلتتىق كونسەرۆاتورياسىنىڭ مۋزىكانتتارى، بەلگىلى انشىلەر، قالا تۇرعىندارى مەن قوناقتارى ۇلى اقىننىڭ اندەرىن ءبىر مەزەتتە شىرقادى.
10:00-دە الماتى اسپانىندا اۋەزدى ءان قالىقتاپ، قالاداعى مەرەكەلىك كوڭىل-كۇيدى ودان ءارى ارتتىردى. بۇل شارا اباي مۇراسىن جاڭعىرتۋ، دارىپتەۋ جانە بولاشاق ۇرپاققا جەتكىزۋ ماقساتىندا ۇيىمداستىرىلدى.
مەرەكەلىك ءىس-شارا رەسپۋبليكا سارايى الدىنداعى ساحنادا جالعاستى. تەاتر ارتىستەرى «جاڭا عاسىر» سپەكتاكلىن قويىپ، «الاتاۋ» ءداستۇرلى ونەر تەاترىنىڭ ارتىستەرى ۇلتتىق مادەنيەتتى دارىپتەيتىن ەرەكشە قويىلىمدار ۇسىندى.
كەشكە Steppe Sons, Tumar ءانسامبلى، ۇلى دالا قىزدارى، جۇمىر قىلىش، ILIGAI ءانسامبلى، مۋزارت Life, Aldaspan توپتارى جانە ءجاميلا سەركەباەۆا، بيبىگۇل قىلىمحان، دياس مۇراتحان، ساندۋعاش ستامعازيەۆا، تىلەك بازاروۆ، مارال اناربەك، قايراتبەك بەكتۇرسىن سىندى انشىلەر ونەر كورسەتتى.
