8 قاراشا كۇنى الماتى وبلىسىنىڭ ءىرى ءارى تاريحي ءوڭىرى — جامبىل اۋدانىنىڭ ۇزىناعاش اۋىلىندا «اۋىل ايەلى: بىرلىك. دامۋ. بولاشاق» اتتى ايماقتىق اۋىل ايەلدەرىنىڭ فورۋمى ءوتتى. ءىس-شاراعا 340-قا جۋىق بەلسەندى اۋىل ايەلدەرى قاتىستى.
فورۋم قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ، «اۋىل» پارتياسىنىڭ جانە الماتى وبلىسى اكىمدىگىنىڭ قولداۋىمەن ۇيىمداستىرىلدى.
باستى ماقسات — اۋىلدىق جەرلەردەگى ايەلدەردىڭ كوشباسشىلىق الەۋەتىن ارتتىرىپ، ولاردىڭ ەكونوميكالىق مۇمكىندىكتەرىن كەڭەيتۋ. بۇل باستاما مەملەكەت باسشىسى قاسىم-جومارت توقاەۆتىڭ اۋىلدىڭ تۇراقتى دامۋىنا باعىتتالعان ساياساتىنىڭ اياسىندا جۇزەگە اسىرىلىپ وتىر.
فورۋمنىڭ اشىلۋ سالتاناتىندا الماتى وبلىسى اكىمىنىڭ ورىنباسارى، وڭىرلىك كوميسسيا توراعاسى عاني مايلىباەۆ، جامبىل اۋدانىنىڭ اكىمى ەرتاس ەرتاسۇلى، سونداي-اق پرەزيدەنت جانىنداعى ۇلتتىق كوميسسيا مۇشەسى ايگەرىم سارسەنباەۆا جانە «اۋىل» پارتياسى توراعاسىنىڭ ورىنباسارى عالىمجان قۇسمانعالي ءسوز سويلەدى.
پلەنارلىق وتىرىس «اۋىلدىق جەرلەردەگى ايەلدەردىڭ الەۋمەتتىك-ەكونوميكالىق مۇمكىندىكتەرىن كەڭەيتۋ: وڭىرلىك دامۋ ساياساتىنىڭ نەگىزى» تاقىرىبىنا ارنالدى. وندا اۋىل كاسىپكەرلىگىن دامىتۋ، قارجىلىق جانە الەۋمەتتىك قولداۋ تەتىكتەرى، قۇقىقتىق مۇمكىندىكتەر مەن ەكسپورتتىق الەۋەت ماسەلەلەرى جان-جاقتى تالقىلاندى.
الماتى وبلىسىنىڭ كاسىپكەرلىك باسقارماسى مەملەكەتتىك گرانتتار مەن جەڭىلدەتىلگەن نەسيە بەرۋ شارتتارىن تانىستىرسا، جۇمىسپەن قامتۋدى ۇيلەستىرۋ باسقارماسى ايەلدەرگە ارنالعان الەۋمەتتىك باعدارلامالاردىڭ ناتيجەلەرى تۋرالى باياندادى. اۋىل كاسىپكەرلەرى ءوز تاجىريبەلەرىمەن ءبولىسىپ، اۋىل شارۋاشىلىعىنداعى كووپەراتسيانىڭ ماڭىزدىلىعىن اتاپ ءوتتى.
فورۋم اياسىندا اۋىل ايەلدەرىنىڭ قولىنان شىققان اۋىل شارۋاشىلىق ونىمدەرى مەن قولونەر بۇيىمدارىنىڭ كورمەسى ۇيىمداستىرىلىپ، ولاردىڭ ەڭبەك الەۋەتى مەن ۇلتتىق ءداستۇردى ساقتاۋداعى ۇلەسى كورسەتىلدى.
قورىتىندىسىندا فورۋمدا كوتەرىلگەن بارلىق ۇسىنىستار مەن وزەكتى ماسەلەلەر پرەزيدەنت جانىنداعى ۇلتتىق كوميسسيانىڭ ساراپتامالىق جۇمىسىنا ەنگىزىلىپ، ورتالىق مەملەكەتتىك ورگاندارعا زاڭنامالىق جانە اكىمشىلىك دەڭگەيدە قاراۋ ءۇشىن جولداناتىنى ايتىلدى.
