الماتى وبلىسىنىڭ قاسكەلەڭ قالاسىندا ءجاسوسپىرىم قىزدار اراسىندا بولعان توبەلەسكە بايلانىستى قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىلەردە تاراعان اقپاراتقا سايكەس، جوعارى سىنىپ وقۋشىلارى كوللەدجدەگى قۇربىلارىمەن بىرگە 9-سىنىپ وقۋشىسىنا شابۋىل جاساعان. وقيعا 10 ءساۋىر كۇنى بولعانى حابارلاندى. الدىن الا مالىمەت بويىنشا، جانجال قىزداردىڭ بىرىنە ايتىلعان سوزدەن كەيىن تۋىنداعان.
زارداپ شەككەن قىزدى توپ بولىپ ۇرىپ-سوعىپ، ونى تىزەرلەتۋگە ماجبۇرلەگەن. سونىمەن قاتار بولعان جاعدايدى ۆيدەوعا تۇسىرگەن. كەيىن قىز كەشىرىم سۇراعان سوڭ بوساتىلىپ، اتا-اناسىنا حابارلاسقان.
وقيعاعا قاتىستى الماتى وبلىستىق پوليتسيا دەپارتامەنتى قىلمىستىق ءىس قوزعاعانىن مالىمدەدى. ۆەدومستۆو وكىلدەرىنىڭ ايتۋىنشا، بارلىق ءمان-جاي انىقتالىپ، پروتسەسسۋالدىق تەكسەرىس جۇرگىزىلگەن.
ەكى ءجاسوسپىرىم پروفيلاكتيكالىق ەسەپكە الىنىپ، ءىس ماتەريالدارى كامەلەتكە تولماعانداردىڭ ىستەرى جونىندەگى كوميسسياعا جولداندى. سونىمەن قاتار، قاتىسۋشىلاردىڭ اتا-انالارى بالالاردى تاربيەلەۋ مىندەتتەرىن تيىسىنشە ورىنداماعانى ءۇشىن اكىمشىلىك جاۋاپكەرشىلىككە تارتىلدى.
قازىرگى ۋاقىتتا تەرگەۋ جالعاسىپ جاتىر. پوليتسيا وقيعاعا قاتىسى بار باسقا دا تۇلعالاردىڭ ارەكەتىنە قۇقىقتىق باعا بەرۋ ءۇشىن تەكسەرۋ جۇرگىزىپ جاتقانىن حابارلادى.
