Almatyda Naýryz meıramy aıasynda Abaı Qunanbaıulynyń 180 jyldyǵyna arnalǵan erekshe mádenı shara ótti. Qala ákimdiginiń málimetinshe, 5000-nan astam adam Abaıdyń áıgili «Kózimniń qarasy» men «Jelsiz túnde jaryq aı» ánderin bir ýaqytta oryndap, qazaqtyń uly aqynynyń murasyn ulyqtady, dep habarlaıdy "Adyrna" ulttyq portaly.
Shara Abaı dańǵyly boıynda uıymdastyryldy. Baıqadamov atyndaǵy Memlekettik hor kapellasynyń ártisteri, P.Chaıkovskıı atyndaǵy Almaty mýzykalyq kolledjiniń stýdentteri, Qurmanǵazy atyndaǵy Qazaq ulttyq konservatorııasynyń mýzykanttary, belgili ánshiler, qala turǵyndary men qonaqtary uly aqynnyń ánderin bir mezette shyrqady.
10:00-de Almaty aspanynda áýezdi án qalyqtap, qaladaǵy merekelik kóńil-kúıdi odan ári arttyrdy. Bul shara Abaı murasyn jańǵyrtý, dáripteý jáne bolashaq urpaqqa jetkizý maqsatynda uıymdastyryldy.
Merekelik is-shara Respýblıka saraıy aldyndaǵy sahnada jalǵasty. Teatr ártisteri «Jańa ǵasyr» spektaklin qoıyp, «Alataý» dástúrli óner teatrynyń ártisteri ulttyq mádenıetti dáripteıtin erekshe qoıylymdar usyndy.
Keshke Steppe Sons, Tumar ansambli, Uly Dala qyzdary, Jumyr Qylysh, ILIGAI ansambli, MýzArt Life, Aldaspan toptary jáne Jámılá Serkebaeva, Bıbigúl Qylymhan, Dıas Murathan, Sandýǵash Stamǵazıeva, Tilek Bazarov, Maral Anarbek, Qaıratbek Bektursyn syndy ánshiler óner kórsetti.
