سەنات دەپۋتاتى بيبىگۇل جەكسەنباي ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا قازاقى يت تۇقىمدارىنىڭ كۇنىن قىركۇيەكتەن قاراشاعا اۋىستىرۋدى ۇسىندى، دەپ حابارلايدى “ادىرنا” ۇلتتىق پورتالى ينفورمبيۋروعا سىلتەپ.
بۇعان دەيىن ەكولوگيا مينيسترلىگى اتالعان مەرەكەنى 3 قىركۇيەكتە اتاپ ءوتۋدى ۇسىنعان ەدى. الايدا ۇلتتىق كينولوگتار قاۋىمداستىعى بۇل كۇننىڭ تاريحي جانە مادەني داستۇرلەرگە سايكەس كەلمەيتىنىن العا تارتتى.
“قازاق اڭشىلىق مادەنيەتىندە تازى مەن توبەت – تەك يت تۇقىمى عانا ەمەس، كوشپەندىلەردىڭ سەنىمدى سەرىگى، اڭشىلىق پەن دالا ءومىرىنىڭ سيمۆولى. ءداستۇر بويىنشا، قازاقستاندا اڭ اۋلاۋ ماۋسىمى العاشقى قار تۇسكەن ساتتە، ياعني قاراشا ايىندا – قانسوناردا باستالادى. سوندىقتان تازى مەن توبەت كۇنىن وسى كەزەڭگە ورايلاستىرىپ، قاراشانىڭ ءبىرىنشى جەكسەنبىسىنە بەلگىلەۋدى قاراستىرۋ قاجەت”، – دەدى سەناتور.
ايتا كەتەيىك، ۇلتتىق قۇرىلتايدا مەملەكەت باسشىسى قاسىم-جومارت توقاەۆ قازاقتىڭ تازىسى حالىقارالىق تىزىمگە ەنگىزىلگەنىن مالىمدەگەن بولاتىن. سونداي-اق، پرەزيدەنت فرانتسياعا ساپارى كەزىندە ەممانيۋەل ماكرونعا قوس تازى سىيلاعانىن اتاپ ءوتتى.
“اڭ اۋلايتىن ايرىقشا قاسيەتتەرى بار قازاقى ءيتتىڭ تۇقىمىن ەندى بۇكىل الەم بىلەدى. فرانتسيالىقتار تازىلاردىڭ ەرەكشە قابىلەتىنە ءتانتى بولدى”، – دەدى قاسىم-جومارت توقاەۆ.
ەندى قازاقى يت تۇقىمدارىنىڭ كۇنى ناقتى قاي ايدا اتاپ وتىلەتىنى تۋرالى شەشىم ۇكىمەت دەڭگەيىندە قاراستىرىلۋى مۇمكىن.
