Senat depýtaty Bıbigúl Jeksenbaı Úkimet basshysy Oljas Bektenovtiń atyna joldaǵan saýalynda qazaqy ıt tuqymdarynyń kúnin qyrkúıekten qarashaǵa aýystyrýdy usyndy, dep habarlaıdy “Adyrna” ulttyq portaly Informbıýroǵa siltep.
Buǵan deıin ekologııa mınıstrligi atalǵan merekeni 3 qyrkúıekte atap ótýdi usynǵan edi. Alaıda ulttyq kınologtar qaýymdastyǵy bul kúnniń tarıhı jáne mádenı dástúrlerge sáıkes kelmeıtinin alǵa tartty.
“Qazaq ańshylyq mádenıetinde tazy men tóbet – tek ıt tuqymy ǵana emes, kóshpendilerdiń senimdi serigi, ańshylyq pen dala ómiriniń sımvoly. Dástúr boıynsha, Qazaqstanda ań aýlaý maýsymy alǵashqy qar túsken sátte, ıaǵnı qarasha aıynda – qansonarda bastalady. Sondyqtan Tazy men tóbet kúnin osy kezeńge oraılastyryp, qarashanyń birinshi jeksenbisine belgileýdi qarastyrý qajet”, – dedi senator.
Aıta keteıik, Ulttyq quryltaıda Memleket basshysy Qasym-Jomart Toqaev qazaqtyń tazysy halyqaralyq tizimge engizilgenin málimdegen bolatyn. Sondaı-aq, Prezıdent Franııaǵa sapary kezinde Emmanıýel Makronǵa qos tazy syılaǵanyn atap ótti.
“Ań aýlaıtyn aıryqsha qasıetteri bar qazaqy ıttiń tuqymyn endi búkil álem biledi. Franııalyqtar tazylardyń erekshe qabiletine tánti boldy”, – dedi Qasym-Jomart Toqaev.
Endi qazaqy ıt tuqymdarynyń kúni naqty qaı aıda atap ótiletini týraly sheshim Úkimet deńgeıinde qarastyrylýy múmkin.
