يت، مىسىقتى قاراۋسىز قالدىرسا، قىلمىستىق جاۋاپقا تارتادى ەكەن

3217
Adyrna.kz Telegram

جانۋارلار - تىرشىلىك يەسى. ولار شاعىمدانىپ، لايىقتى جاۋاپ قايتارا الماسا دا، ادامدار سياقتى اۋىرىپ،ازاپ شەگەدى. ماحاتما گاندي ءبىر سوزىندە: "ءاربىر ۇلتتىڭ مورالدىق دامۋ ۇدەرىسىن جانۋارلارعا قالاي قارايتىندىعى ارقىلى بىلۋگە بولادى" دەگەن بولاتىن. قازىرگى تاڭدا ەلىمىزدە جانۋارلاردى قورعاۋ ماسەلەسى قىزۋ تالقىلانىپ جاتىر. وكىنىشكە وراي، قازاقستاندا جانۋارلار قۇقىعىن قورعاۋ تۋرالى ارنايى زاڭ جوق.

قر ازاماتتىق كودەكسىنىڭ 124-بابى بويىنشا جانۋارلار ادامنىڭ جەكە مەنشىگى بولىپ تابىلادى. دەمەك، جانۋار يەسى مۇلىكتى ءوز قالاۋىنشا پايدالانۋعا قۇقىلى.  ال، الەم ەلدەرى جانۋارلاردى قالاي قورعايدى؟

ءۇيسىز جانۋارلار مۇلدەم كەزدەسپەيدى

نيدارلاندتا جانۋارلار قۇقىعى تۋرالى زاڭ بار. ول ءۇيسىز جانۋارلار مۇلدەم كەزدەسپەيتىن الەمدەگى العاشقى مەملەكەت.بۇل ەلدە 2015 جىلدان باستاپ جانۋارلاردى تسيركتە پايدالانۋعا تيىم سالىنعان. مەملەكەت جانۋارلارعا ناشار قارىم-قاتىناس جاساعانداردى  قاتاڭ جازالايدى. اتاپ ايتساق،  ولارعا قاتىگەزدىك كورسەتكەنى ءۇشىن 3 جىل باس بوستاندىعىنان ايىرىپ، 17 000 ەۆرو كولەمىندە ايىپپۇل تولەتەدى.

جانۋارلاردى قورلاعان ادامدار ەلدەن قۋىلادى

جاڭا زەلانديادا 2016 جىلدىڭ ساۋىرىنەن باستاپ بارلىق جانۋارلار رەسمي تۇردە سەزىمتال تىرشىلىك يەسى دەپ تانىلدى. مەملەكەتتە جانۋارلارعا زەرتتەۋلەر مەن تاجىريبەلەر جاساۋعا تىيىم سالىنعان. ءۇي جانۋارلارىن نەمەسە جابايى اڭداردى اۋلاۋ زاڭسىز بولىپ تابىلادى. سونىمەن قاتار، جاڭا زەلانديا جانۋارلاردى قورلاعان ادامداردى ەلدەن قۋادى.

جانۋارلارعا ارقاشان مەيىرىم كورسەتۋ كەرەك

يتاليا مىسىق نەمەسە ءيتتى تاستاپ كەتكەن ادامداردى قىلمىستىق جاۋاپكەرشىلىككە تارتادى. جانۋارلاردى ەۆتانازيالاۋعا مۇلدەم تىيىم سالىنعان. تۋرين قالاسىندا ءۇي جانۋارلارىنىڭ شاشتارىن ءارتۇرلى تۇسكە بوياۋعا رۇقسات جوق.  ال رەدجو-ەميليا قالاسىنىڭ بيلىگى مىسىقتاردى، يتتەر مەن قۇستاردى ەركەلەتۋگە،  باعۋعا مىندەتتەيتىن زاڭ شىعاردى. جانۋارلارعا دەگەن مەيىرىمنىڭ جەتكىلىكسىزدىگى ءۇشىن ادامدارعا 500 ەۋروعا دەيىن ايىپپۇل سالىنادى.

ادام مەن جانۋاردىڭ قۇقىعى تەڭ

يسپانيا الەمدە العاش رەت ادام مەن جانۋاردىڭ قۇقىقتارىن تەڭەستىردى.  بۇل ەلدە مايمىلداردى جەكە مەنشىك وبەكتىسى رەتىندە قاراستىرۋعا بولمايدى. ولار بوستاندىقتا ءومىر سۇرۋگە قۇقىلى.

 «جانۋارلاردى قورعاۋشى» ماماندىعى بار

گەرمانيادا جانۋارلار قۇقىعى كونستيتۋتسيامەن قورعالادى. ەلدە «جانۋارلاردى قورعاۋشى» ماماندىعى بار .

تسيركتە جانۋارلاردى پايدالانبايدى

اۆستريادا  تاۋىقتاردى تىعىز تورلاردا ۇستاۋعا، مالدى تىعىز ارقانمەن بايلاۋعا بولمايدى. جابايى جانۋارلاردى تسيركتەردە پايدالانۋعا قاتاڭ تىيىم سالىنعان.

 

 ديانا اسانوۆا، "ادىرنا" ۇلتتىق پورتالى.

پىكىرلەر