جامبىل وبلىسىنىڭ بۇرىنعى اكىمى كارىم كوكىرەكباەۆقا قاتىستى سوت پروتسەسى سەگىز ايعا سوزىلىپ، ءالى كۇنگە دەيىن ۇكىم شىقپاعان. انتيكوررۋپتسيالىق قىزمەت بۇل جاعدايدىڭ سەبەبىن ءتۇسىندىردى، دەپ حابارلايدى "ادىرنا" ۇلتتىق پورتالى.
انتيكور توراعاسىنىڭ ورىنباسارى دارحان قۇراقباەۆتىڭ ايتۋىنشا، ءىس سوت قاراۋىندا، بىراق تەرگەۋ مۇددەسىنە بايلانىستى تولىق اقپارات بەرۋ مۇمكىن ەمەس.
ء"ىس سوتقا جىبەرىلدى، قازىر قارالىپ جاتىر. الايدا تەرگەۋ مۇددەسىنە بايلانىستى ەگجەي-تەگجەيلى مالىمەتتەردى جاريالاي المايمىز. ازىرگە ناقتى شەشىم جوق، قانداي دا ءبىر پىكىر بىلدىرۋگە قۇقىعىمىز جوق،" – دەدى قۇراقباەۆ.
قازىرگى تاڭدا كوكىرەكباەۆ قاماۋدا وتىر.
2022 جىلدىڭ جەلتوقسان ايىنىڭ سوڭىندا "قر تجم قازسەلدەنقورعاۋ" مەملەكەتتىك مەكەمەسىنىڭ ديرەكتورى كارىم كوكىرەكباەۆ پارا الۋ كۇدىگىمەن ۇستالعان بولاتىن. تەرگەۋ مالىمەتتەرى بويىنشا، ول BAZIS CONSTRUCTION - INFR كومپانياسىنىڭ فيليال ديرەكتورى اندرەي پوپلاۆسكيدەن 800 مىڭ دوللار كولەمىندە پارا الدى دەپ ايىپتالعان.
باستاپقىدا جامبىل وبلىسىنىڭ القابيلەر سوتى ەكس-اكىمدى اقتاپ شىققان. الايدا، ەكى اپتادان كەيىن بۇل ۇكىم كۇشىن جويىپ، كوكىرەكباەۆ قايتادان قاماۋعا الىنعان.
قازىرگى تاڭدا سوت پروتسەسى جالعاسۋدا، ال ونىڭ ناتيجەسى ءالى بەلگىسىز.
