پرەزيدەنت: زاڭ بارىنە ورتاق، بۇل – اكسيوما

168
Adyrna.kz Telegram
https://adyrna.kz/storage/uploads/ERxQv7RWLqo2EfBMBUasik91tEYHLIgqiDrswRbL.jpg

19 قاراشادا مەملەكەت باسشىسى قاسىم-جومارت توقاەۆ سىبايلاس جەمقورلىققا قاتىسى بار تۇلعالارعا ەشقانداي جەڭىلدىك جاسالماۋى كەرەكتىگىن ايتتى، دەپ حابارلايدى “ادىرنا”. 

ونىڭ ايتۋىنشا، كىناسى دالەلدەنگەن ءاربىر ادام زاڭدا كوزدەلگەن جاۋاپكەرشىلىكتەن جالتارماۋى ءتيىس.

پرەزيدەنت III ستراتەگيالىق ارىپتەستەر فورۋمىندا سويلەگەن سوزىندە قازاقستان سەنىمدى سەرىكتەس رەتىندە «زاڭ مەن ءتارتىپ» كونستيتۋتسيالىق قاعيداتى تۇراقتى، بولجامدى ءارى اشىق ورتانىڭ بەرىك نەگىزىنە اينالۋى ءۇشىن بارلىق قاجەتتى جاعدايدى جاسايتىنىن اتاپ ءوتتى.

مەملەكەت باسشىسىنىڭ ايتۋىنشا، «زاڭ مەن ءتارتىپ» – مەملەكەتتىك ساياساتتىڭ جاي عانا ءبىر باعىتى ەمەس، ادىلەتتى قازاقستاندى قۇرۋعا باعىتتالعان ساياساتىنىڭ نەگىزگى تىرەگى. سونداي-اق ەلىمىزدەگى اۋقىمدى ساياسي جانە الەۋمەتتىك-ەكونوميكالىق رەفورمالار وسى قاعيداتقا نەگىزدەلگەن.

قاسىم-جومارت توقاەۆ كونستيتۋتسيادا زاڭ ۇستەمدىگى مەن ازاماتتاردىڭ زاڭ الدىنداعى تەڭدىگى بەكىتىلگەنىن ەسكە سالدى.

پرەزيدەنت سىبايلاس جەمقورلىقتىڭ مەملەكەتكە دەگەن حالىق سەنىمىن السىرەتىپ، ەلدىڭ ساپالى دامۋىنا كەدەرگى كەلتىرەتىنىن ايتتى. ونىڭ سوزىنشە، مۇنداي ارەكەتتەر جۇرگىزىلىپ جاتقان رەفورمالاردىڭ ناتيجەسىنە دە كەرى اسەر ەتەدى.

«كىناسى دالەلدەنگەن ەشكىم زاڭدا كوزدەلگەن جاۋاپكەرشىلىكتەن جالتارماۋى ءتيىس. زاڭ بارىنە ورتاق. بۇل – اكسيوما»، – دەدى مەملەكەت باسشىسى.

توقاەۆتىڭ پىكىرىنشە، زاڭ تالاپتارىن بارشاعا بىردەي قولدانۋ رەفورمالاردىڭ قايتىمسىزدىعىن قامتاماسىز ەتىپ، ازاماتتاردىڭ سەنىمىن اقتاۋعا مۇمكىندىك بەرەدى.

پىكىرلەر