تاراز قالاسىندا XI عاسىردان بەرى ساقتالىپ كەلە جاتقان تاريحي "تورتكۇل" كەرۋەن سارايىنىڭ ءبىر قابىرعاسى وپىرىلىپ ءتۇستى. ەل اۋماعىنداعى اشىق اسپان استىنداعى جالعىز مۋزەي-قامال سانالاتىن نىساننىڭ قازىرگى جاعدايى مۇشكىل. قالعان بولىگى دە قاۋساپ تۇرعاندىقتان، ماڭايداعى تۇرعىندار ونىڭ باسپانالارىنا قۇلاۋىنان قاۋىپتەنۋدە، دەپ حابارلايدى "ادىرنا" ۇلتتىق پورتالى.
كەرۋەن ساراي كەزىندە ۇلى جىبەك جولىنىڭ ماڭىزدى ساۋدا نۇكتەلەرىنىڭ ءبىرى بولعان. الايدا بۇگىندە تاريحي ەسكەرتكىشتىڭ بەس مەترلىك قابىرعالارى قۇلاپ، اينالاسىنا توپىراق توگىلىپ جاتىر. كوپشىلىك كونە نىساننىڭ كۇتىمسىز قالعانىنا نارازى.
"قازىرگى جاعدايدا ەلگە قاۋىپتى بولىپ تۇر. بۇل قۇلاعانى ءبىرىنشى رەت ەمەس، الدىندا دا وپىرىلعان. سۋ اعارلارىن دا قاتە ورناتقان. مۇندا حالىق ۇنەمى جۇرەدى، تروتۋار وتە تار، ال ونىڭ جانىندا كولىك جولى بار. ەگەر تاعى ءبىر بولىگى قۇلاسا، ادامدار قايدا قاشادى؟" – دەيدى جەرگىلىكتى تۇرعىندار.
تاريحي ەسكەرتكىشتىڭ قۇلاۋىنا نە سەبەپ بولعانى ازىرگە بەلگىسىز. جەرگىلىكتى بيلىك بۇل ماسەلەگە قاتىستى رەسمي تۇسىنىكتەمە بەرگەن جوق. تۇرعىندار جاۋاپتى ورگانداردان كونە قامالدى ساقتاپ قالۋ ءۇشىن شۇعىل شارا قابىلداۋدى تالاپ ەتۋدە.
