Taraz qalasynda XI ǵasyrdan beri saqtalyp kele jatqan tarıhı "Tórtkúl" kerýen saraıynyń bir qabyrǵasy opyrylyp tústi. El aýmaǵyndaǵy ashyq aspan astyndaǵy jalǵyz mýzeı-qamal sanalatyn nysannyń qazirgi jaǵdaıy múshkil. Qalǵan bóligi de qaýsap turǵandyqtan, mańaıdaǵy turǵyndar onyń baspanalaryna qulaýynan qaýiptenýde, dep habarlaıdy "Adyrna" ulttyq portaly.
Kerýen saraı kezinde Uly Jibek jolynyń mańyzdy saýda núkteleriniń biri bolǵan. Alaıda búginde tarıhı eskertkishtiń bes metrlik qabyrǵalary qulap, aınalasyna topyraq tógilip jatyr. Kópshilik kóne nysannyń kútimsiz qalǵanyna narazy.
"Qazirgi jaǵdaıda elge qaýipti bolyp tur. Bul qulaǵany birinshi ret emes, aldynda da opyrylǵan. Sý aǵarlaryn da qate ornatqan. Munda halyq únemi júredi, trotýar óte tar, al onyń janynda kólik joly bar. Eger taǵy bir bóligi qulasa, adamdar qaıda qashady?" – deıdi jergilikti turǵyndar.
Tarıhı eskertkishtiń qulaýyna ne sebep bolǵany ázirge belgisiz. Jergilikti bılik bul máselege qatysty resmı túsinikteme bergen joq. Turǵyndar jaýapty organdardan kóne qamaldy saqtap qalý úshin shuǵyl shara qabyldaýdy talap etýde.
