28 جاستاعى قازاقستاندىق ۆولەيبولشى سابينا التىنبەكوۆا الەۋمەتتىك جەلىلەردە كۇيەۋىمەن اجىراسقانىن مالىمدەدى. سپورتشى بۇل شەشىمنىڭ ءوز باستاماسىمەن قابىلدانعانىن مەڭزەدى، دەپ حابارلايدى “ادىرنا” ۇلتتىق پورتالى.
«بۇل الەمدە وزگە پىكىرلەردىڭ داۋىسى ءجيى ءوزىڭنىڭ داۋىسىڭنان قاتتىراق شىققاندا، وزىڭە ادال بولۋ — ناعىز كۇشتىڭ كورىنىسى. بۇل سىرتقى اسەرلەرگە قارسى تۇرۋ عانا ەمەس، شىنايى كۇشتىڭ اكتىسى. ايەل تەك وزىنە قۇلاق اسۋدى تاڭداعاندا، ول جان دۇنيەسىنىڭ مانىمەن ۇيلەسىمگە ەنەدى»، – دەپ جازدى التىنبەكوۆا.
سابينا التىنبەكوۆا 2020 جىلدىڭ 25 جەلتوقسانىندا پروديۋسەر سايات توستىقباەۆقا تۇرمىسقا شىققان بولاتىن. ولار الەۋمەتتىك جەلى ارقىلى تانىسىپ، بىرنەشە اي حات الماسقاننان كەيىن نەكەلەسكەن. 2021 جىلى جۇپتىڭ ۇلى دۇنيەگە كەلدى.
قازان ايىندا التىنبەكوۆا يندونەزيانىڭ «Yogya Falcons» كلۋبىنا قوسىلىپ، كاپيتاندىق مىندەتتى ءوز قولىنا الدى. ول كوماندا قۇرامىندا العاش رەت Yogya Volley Cup – 2024 تۋرنيرىندە جەڭىسكە جەتتى.
سپورتشى بۇعان دەيىن قازاقستاندىق جانە شەتەلدىك باق-تى سالىستىرىپ، وتاندىق مەديانىڭ ءوز سپورتشىلارىن جەتكىلىكتى دارەجەدە قولدامايتىنىن سىنعا العان بولاتىن.
«مەن بايقاعانىم، باسقا ەلدەردىڭ باق-تارى تەك جاعىمدى جاڭالىقتاردى جازادى. ال بىزدىكىلەر كەرىسىنشە، نەگاتيۆكە كوپ كوڭىل بولەدى. ءدال وسى سەبەپتەن تالانتتى جاستار شەتەلگە كەتۋگە ءماجبۇر. بوتەن ەلدە دە سەنىڭ جەتىستىكتەرىڭدى باعالايدى»، – دەپ جازدى ول.
ايتا كەتەيىك، جاقىندا عانا التىنبەكوۆا بەس بالانى دۇنيەگە اكەلگىسى كەلەتىنىن ايتقان ەدى.
