28 jastaǵy qazaqstandyq voleıbolshy Sabına Altynbekova áleýmettik jelilerde kúıeýimen ajyrasqanyn málimdedi. Sportshy bul sheshimniń óz bastamasymen qabyldanǵanyn meńzedi, dep habarlaıdy “Adyrna” ulttyq portaly.
«Bul álemde ózge pikirlerdiń daýysy jıi ózińniń daýysyńnan qattyraq shyqqanda, ózińe adal bolý — naǵyz kúshtiń kórinisi. Bul syrtqy áserlerge qarsy turý ǵana emes, shynaıy kúshtiń aktisi. Áıel tek ózine qulaq asýdy tańdaǵanda, ol jan dúnıesiniń mánimen úılesimge enedi», – dep jazdy Altynbekova.
Sabına Altynbekova 2020 jyldyń 25 jeltoqsanynda prodıýser Saıat Tostyqbaevqa turmysqa shyqqan bolatyn. Olar áleýmettik jeli arqyly tanysyp, birneshe aı hat almasqannan keıin nekelesken. 2021 jyly juptyń uly dúnıege keldi.
Qazan aıynda Altynbekova Indonezııanyń «Yogya Falcons» klýbyna qosylyp, kapıtandyq mindetti óz qolyna aldy. Ol komanda quramynda alǵash ret Yogya Volley Cup – 2024 týrnırinde jeńiske jetti.
Sportshy buǵan deıin qazaqstandyq jáne sheteldik BAQ-ty salystyryp, otandyq medıanyń óz sportshylaryn jetkilikti dárejede qoldamaıtynyn synǵa alǵan bolatyn.
«Men baıqaǵanym, basqa elderdiń BAQ-tary tek jaǵymdy jańalyqtardy jazady. Al bizdikiler kerisinshe, negatıvke kóp kóńil bóledi. Dál osy sebepten talantty jastar shetelge ketýge májbúr. Bóten elde de seniń jetistikterińdi baǵalaıdy», – dep jazdy ol.
Aıta keteıik, jaqynda ǵana Altynbekova bes balany dúnıege ákelgisi keletinin aıtqan edi.
