انتيكوررۋپتسيالىق قىزمەت ارعىن نىعماتۋليندى ىزدەستىرۋ بويىنشا مالىمەتتەردى جاريالادى، دەپ حابارلايدى "ادىرنا" ۇلتتىق پورتالى.
انتيكوردىڭ رەسمي وكىلى دانيار بيعايداروۆتىڭ ايتۋىنشا، ارعىن نىعماتۋلينگە قاتىستى قىلمىستىق ءىس 2024 جىلعى 7 جەلتوقساندا قىلمىستىق ءىس جۇرگىزۋ كودەكسىنىڭ 186-بابىنا سايكەس باس پروكۋراتۋراعا بەرىلگەن.
ء"بىز تەرگەۋ بارىسىن تۇسىندىرە المايمىز. بىراق اكىمشىلىك راسىمدىك-پروتسەستىك كودەكستىڭ 65-بابىنىڭ 1-بولىگىنە سايكەس، ىزدەستىرۋ شارالارى ءبىزدىڭ قۇزىرەتىمىزدە ەكەنىن ايتا الامىن. اتالعان تۇلعانى ىزدەستىرۋ بويىنشا جەدەل ءىس-شارالاردى انتيكوررۋپتسيالىق قىزمەت جۇزەگە اسىرۋدا. ىزدەستىرۋ جالعاسۋدا، وكىنىشكە قاراي، قازىرگى ۋاقىتتا ەگجەي-تەگجەيلى اقپارات بەرە المايمىن. سەبەبى بۇل ونىڭ جاسىرىنۋىنا اسەر ەتۋى مۇمكىن", – دەدى دانيار بيعايداروۆ انتيكوردا وتكەن بريفينگتە.
سونداي-اق رەسمي وكىل ارعىن نىعماتۋليننىڭ قازاقستان اۋماعىنان تىس جەردە بولۋى مۇمكىن ەكەنىن جوققا شىعارمادى. ويتكەنى وعان حالىقارالىق ىزدەۋ جاريالانعان.
ەسكە سالايىق، بۇعان دەيىن باس پروكۋراتۋرا ارعىن نىعماتۋلين مەن باسقا دا تۇلعالارعا قاتىستى قىلمىستىق كودەكستىڭ 189-بابىنىڭ 4-بولىگى، 2-تارماعى ("سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ") بويىنشا سوتقا دەيىنگى تەرگەۋ جۇرگىزىلىپ جاتقانىن حابارلاعان بولاتىن.
سوت شەشىمىمەن نىعماتۋلينگە قاماۋدا ۇستاۋ تۇرىندەگى بۇلتارتپاۋ شاراسى قابىلدانىپ، وعان ازدەۋ جاريالانعان.
ايتا كەتەيىك، قىلمىستىق كودەكستىڭ 189-بابىنىڭ 4-بولىگى، 2-تارماعىنا سايكەس، سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ قىلمىسى ءۇشىن 7 جىلدان 12 جىلعا دەيىنگى باس بوستاندىعىنان ايىرۋ جازاسى كوزدەلگەن. سونداي-اق مۇلىكتى تاركىلەۋ جانە بەلگىلى ءبىر لاۋازىمداردى اتقارۋ قۇقىعىنان ايىرۋ قاراستىرىلعان.
