قازاقستاننىڭ ءىىم شەرزات پولاتتىڭ ولىمىنە قاتىستى قىلمىستىق ءىستى تەرگەۋدى 2024 جىلدىڭ سوڭىنا دەيىن اياقتاۋدى جوسپارلاعان بولاتىن. بىراق كەيىنىرەك تاعى سەگىز قىلمىستىق ءىس تىركەلدى، سوندىقتان سوتقا دەيىنگى تەرگەۋ جالعاستى. بۇل تۋرالى قر ءىىم ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
"الماتى وبلىسىنىڭ پوليتسيا دەپارتامەنتى تالعار قالاسىندا ادام ءولتىرۋ فاكتىسى بويىنشا قىلمىستىق ءىس قوزعادى. سونىمەن قاتار، ۇرلىق، بۇزاقىلىق، قورقىتۋ جانە قىلمىس تۋرالى حابارلاماۋ فاكتىلەرى بويىنشا سەگىز قىلمىستىق ءىس تىركەلدى.ءىس بويىنشا 11 ايىپتالۋشىعا قاتىستى "قاماۋ" بۇلتارتپاۋ شاراسى تاڭدالدى. قازىرگى ۋاقىتتا سوتقا دەيىنگى تەرگەپ-تەكسەرۋ جۇرگىزىلۋدە، ونىڭ قورىتىندىسى بويىنشا پروتسەسسۋالدىق شەشىم قابىلداناتىن بولادى", — دەپ جاۋاپ بەردى قر ءىىم ءباسپاسوز قىزمەتى قازاقپاراتتىڭ 2025 جىلعى 10 قاڭتارداعى ساۋالىنا.
ەسكە سالساق، 2024 جىلدىڭ 4 قازانىندا تالعاردا جاپپاي توبەلەس بولىپ، ونىڭ بارىسىندا 16 جاستاعى شەرزات پولات پىشاق جاراقاتىنان قايتىس بولعان ەدى. قوعامدىق رەزونانس تۋدىرعان ءجاسوسپىرىمدى ءولتىرۋ دەرەگى بويىنشا قر قىلمىستىق كودەكسىنىڭ بەس بابى بويىنشا 11 كۇدىكتى قاماۋعا الىندى.
2025 جىلدىڭ 3 قاڭتارىندا قاسىم-جومارت توقاەۆ شەرزات پولاتتىڭ ءولتىرىلۋى تۋرالى ايتتى. پرەزيدەنت "تەرگەۋ ارەكەتتەرى اياقتالدى، جاقىن ارادا بۇل ءىس بويىنشا سوت پروتسەسى وتەتىنىن" مالىمدەدى.
