ددسۇ پاندەمياعا بايلانىستى تەرگەۋ جۇرگىزبەك

271

دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) دەنساۋلىق ساقتاۋ مينيسترلەرى دەڭگەيىندە وتكەن كونفەرەنتسيادا كوروناۆيرۋس پاندەمياسىنا بايلانىستى ءجىتى تەرگەۋ جۇرگىزۋ جونىندەگى رەزوليۋتسيانى قولدادى. بۇل تۋرالى centralasian.org حابارلادى.

رەزوليۋتسيا جوباسىن 100 مەملەكەتتىڭ قولداۋىمەن ەۋروپالىق وداق ۇسىندى. ولاردىڭ ىشىندە قىتاي مەن رەسەي دە بار. قۇجات داۋىس بەرۋسىز قابىلداندى. ەشبىر مەملەكەت، ونىڭ ىشىندە اقش تا قارسى بولمادى.

قۇجاتتا كوروناۆيرۋستىڭ كەڭ تارالۋىنا بايلانىستى حالىقارالىق قاۋىمداستىقتىڭ ۇندەۋىن ەسەپ الا وتىرىپ، جان-جاقتى تاۋەلسىز زەرتتەۋ جۇرگىزۋ كەرەكتىگى ايتىلعان. بىراق قۇجاتتا قىتاي جاڭا ۆيرۋستىڭ پايدا بولعان ەل رەتىندە مۇلدەم ايتىلماعان.

ددسۇ-نىڭ ەكى كۇندىك كونفەرەنتسياسىندا ۇيىمدى سىناۋشى اقش پرەزيدەنتى دونالد ترامپ بولدى. ۆاشينگتون بەيجىڭ ەپيدەميانىڭ تەز تارالۋ دەڭگەيىن قۇپيا ۇستادى دەپ ايىپتايدى. امەريكا بيلىگىنىڭ پىكىرىنشە، ددسۇ قىتاي ۋاجىنە سەنىپ، وراسان قاۋىپ اكەلەتىنىنە ءمان بەرمەگەن. سەيسەنبى كۇنى ترامپ ددسۇ-عا قاتەلىكتەرىن تۇزەتۋ ءۇشىن 30 تاۋلىك ۋاقىت بەردى. كەرى جاعدايدا، اقش ۇيىمنان شىعىپ، قارجىلاندىرۋ مۇلدەم توقتاتىلۋى مۇمكىن دەپ ەسكەرتتى.

اقش بيلىگى كوروناۆيرۋس قىتايدىڭ ۋحان قالاسىنداعى ۆيرۋسولوگيا ينستيتۋتىنان شىعۋى مۇمكىن دەگەن بولجامدى العا تارتادى. مۇنداي بولجامعا دالەلدەرى بار ەكەنىن اقش پرەزيدەنتىمەن قوسا، ەلدىڭ مەملەكەتتىك حاتشىسى مايك پومپەو دا مالىمدەگەن.

پىكىرلەر