اقش پرەزيدەنتى دونالد ترامپ پەن رەسەي پرەزيدەنتى ۆلاديمير پۋتين ەكىنشى رەت تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى BBC News-كە سىلتەمە جاساپ.
كرەمل مالىمەتىنشە، ولار ۋكرايناداعى قاقتىعىستى رەتتەۋ جولدارىن تالقىلاپ، ورتاق كۇش-جىگەردى جالعاستىرۋعا نيەتتى ەكەنىن راستاعان.
پۋتين ترامپتىڭ رەسەي مەن ۋكراينانىڭ 30 كۇن بويى ەنەرگەتيكالىق ينفراقۇرىلىم نىساندارىنا شابۋىل جاساماۋ تۋرالى ۇسىنىسىن قولداپ، بۇل جونىندە اسكەري كۇشتەرگە بۇيرىق بەرگەن. سونداي-اق، ول 19 ناۋرىزدا 175 اسكەري تۇتقىننىڭ ايىرباستالاتىنىن حابارلادى.
كرەملدىڭ مالىمدەمەسىندە تاراپتار ۋكراينا ماسەلەسىن رەتتەۋ ءۇشىن امەريكالىق جانە رەسەيلىك ساراپشىلار توپتارىن قۇرۋعا كەلىسكەنى ايتىلدى.
ال اق ءۇيدىڭ قىسقا مالىمدەمەسىندە ەكى ەل بەيبىتشىلىككە قول جەتكىزۋ ءۇشىن اتىستى توقتاتۋ جونىندە كەلىسسوزدەردى باستاۋدى ۇيعارعانى كورسەتىلگەن.
"كوشباسشىلار بەيبىتشىلىككە ۇمتىلۋ ەڭ الدىمەن ەنەرگەتيكا مەن ينفراقۇرىلىم سالاسىنداعى اتىستى توقتاتۋدان باستالاتىنىنا، سونداي-اق قارا تەڭىزدە اتىستى توقتاتۋ جونىندەگى تەحنيكالىق كەلىسسوزدەردى جۇرگىزۋگە، اتىستى تولىق توقتاتۋعا جانە تۇراقتى بەيبىتشىلىك ورناتۋعا كەلىستى. بۇل كەلىسسوزدەر تاياۋ شىعىستا دەرەۋ باستالادى", - دەلىنگەن اق ءۇيدىڭ قورىتىندى مالىمدەمەسىندە.
سونىمەن قاتار، ترامپ پەن پۋتين ستراتەگيالىق قارۋلاردىڭ تارالۋىن توقتاتۋ، تاياۋ شىعىستاعى ىنتىماقتاستىق جانە يراننىڭ يادرولىق قاۋپىنە قاتىستى ماسەلەلەردى تالقىلاعان.
ترامپ ءوزىنىڭ Truth Social الەۋمەتتىك جەلىسىندە پۋتينمەن اڭگىمەسىن «وتە جاقسى جانە ناتيجەلى» دەپ سيپاتتاپ، اتىستى تولىق توقتاتۋ ءۇشىن جەدەل جۇمىس ىستەيتىنىن مالىمدەدى.
اقش پەن رەسەي پرەزيدەنتتەرىنىڭ تەلەفون ارقىلى سويلەسۋىنەن كەيىن ۋكراينا پرەزيدەنتى ۆلاديمير زەلەنسكي بۇل كەلىسسوزدەردىڭ ەگجەي-تەگجەيىن اقش تاراپىنان كۇتىپ وتىرعانىن مالىمدەدى.
حەلسينكيدە جۋرناليستەرگە بەرگەن سۇحباتىندا زەلەنسكي رەسەيدىڭ ەنەرگەتيكالىق ينفراقۇرىلىمىنا شابۋىل جاساۋدى توقتاتۋ ۇسىنىسىن قولدايتىنىن، بىراق ترامپ پەن ءپۋتيننىڭ ناقتى نە تالقىلاعانىن بىلگىسى كەلەتىنىن ايتتى.
كەيىنىرەك ول رەسەيدىڭ ۋكرايناداعى ازاماتتىق ينفراقۇرىلىمعا شابۋىلدارىن جالعاستىرىپ جاتقانىن اتاپ ءوتتى.
«بۇگىن پۋتين اتىستى تولىق توقتاتۋ تۋرالى ۇسىنىستان باس تارتتى. الەم دە ءپۋتيننىڭ سوعىستى سوزۋعا كەز كەلگەن ارەكەتىن قابىلداماۋى كەرەك»، – دەدى زەلەنسكي.
